ЫЛІ СИКТ-ГРЕЗДКӦД ЙИТӦДЫС БУРМӦ

«Рытыв-Войвыв Телеком» акционер котыр бӧръя кадас унатор вӧчӧ ылі сикт-грездъясӧс связьӧн могмӧдӧм кузя.

Кулӧмдін районса овмӧдчӧминъясын ӧні уджалӧ 30 таксофон нин, бӧръясӧ неважӧн лӧсьӧдісны Пузлаӧ. Тайӧ посёлокас телефона йитӧдыс эз уджав вежонъясӧн. Торйӧн нин сьӧкыд вӧлі медикъяслы, кодъяслы пыр колӧ звӧнитчыны Помӧсдінӧ да юрсиктӧ — то абуӧсь колана медикаментъяс, то быть мыйӧнкӧ колӧ мӧдӧдны сьӧкыда висьысьӧс. Асланыс машинаыс тані абу.

Бӧръя кадас жӧ «Связь-Коми» юкӧнса специалистъяс пыртісны уджӧ Зимстанын лыдпаса телефона станция, ӧні вӧчӧны татшӧмсӧ Ручын.