ӦТПЫРЙӦ КУИМ ВЫЛЬ ФАП

Выль воӧдз Кулӧмдін районын шуӧма восьтыны куим выль ФАП.

«Дзоньвидзалун» национальнӧй проект серти Дереваннӧйӧ, Паспомӧ да Пузлаӧ вайисны сідз шусяна модульяс, кодъясӧс тэчӧм бӧрын фельдшерско-акушерскӧй пунктъясын лоӧ йӧзӧс бура могмӧдӧм вылӧ став колана жырйыс да оборудованиеыс. Индӧм сикт-посёлокъясас дыр нин майшасисны, киссьӧм, важ стрӧйбаясын эз вӧв кивыв примитны висьысьясӧс да.

Кыдзи висьталісны Пузласа бурдӧдчанінӧн веськӧдлысь Анна Ивановна Мингалева да акушерка Лидия Калистратовна Завьялова, налӧн больничаын вӧлі став колана аппаратураыс — электрофорез, ультразвук, УВЧ. Вӧлі и специалист, коді кужис уджӧдны найӧс. Но Помӧсдінса леспромхозлӧн киссьӧм бӧрын районса власьтъяс кутісны кӧдзыда видзӧдны ылі посёлок вылӧ, чайтісны, мый сійӧ бырас, оз кут ковны и больничаыс. Йӧзӧс бурдӧдӧм вылӧ этша мӧдіс воны сьӧм, эз ыстыны медикаментъяс. И век жӧ посёлок эз тупкысь. Сэні котыртчӧм «Комилесбизнес» предприятие зумыда сувтіс кок йылас, и войтырлӧн лоис уджаланін, чужис аскиа лунӧ эскӧм. Больнича эз пӧдлась, важ ног примитіс бурдӧдчысьясӧс. Сьӧкыдджык висьысьясӧс мӧдӧдісны Помӧсдінӧ, мукӧдыслы отсалісны места вылын. Больничалысь тӧждъяссӧ гӧгӧрвоӧмӧн посёлоксаяс асьныс чукӧртчисны да ньӧбисны холодильник. Вӧльдін овмӧдчӧминса сӧвет ассяньыс торйӧдыштіс жӧ сьӧм медся коланаторъяс вылас.

— Выль ФАП-сӧ восьтыны тані важӧн нин коліс, — шуӧ веськӧдлысь А. И. Мингалева, — ӧнія стрӧйбаыс, кӧть и зілям дзоньтавны, оз нин шогмы, джоджыс киссьӧ, стенъяссӧ сёйӧ тшак. А волывлысьыс уна — луннас пыравлӧ 20 мортӧдз. Ӧти пӧрйӧ вайисны сьӧкыд висьысьӧс, а телефон оз уджав, «Тэрыб отсӧг» корны некыдз. Ковмис звӧнитчыны «Комилесбизнеслӧн» базасянь спутника йитӧд пыр. Тайӧ жӧ овмӧсыс отсавлӧ, ковмас кӧ транспорт.

Сылӧн кывъяс серти, телефон кындзи эм и мукӧд майшӧг: шуам, оз тырмыны лекарствояс, оз вермыны ньӧбны сухожарӧвӧй шкап. Медикъяс ёна надейтчӧны выль ФАП вылӧ. Ми пӧ пенсия вылынӧсь нин, виччысям асьнымӧс вежысьясӧс. Выль стрӧйбаад том специалистъясыд, тӧдӧмысь, окотапырысьджык локтасны.