«ВА КОМИӦН»?

Комиын шулӧны: кырссьӧ пӧ сё матӧн. Но ӧд водзті миян муын весиг «мат» кывсӧ эз тӧдлыны. Медся паськалӧм видчӧмнас, олӧма йӧзлӧн казьтылӧмъяс серти, вӧлӧмаӧсь «куршайт», «ракашой», «йӧрашой», «сёкарнан» да мукӧд татшӧм кывйитӧд.

Ӧнія кадӧ нин ыджыд батьыс чукӧстас внуксӧ:

— Ноко, волы татчӧ, чуклябедь!

А ыджыд мамыс вувзьысяс, мыйла пӧ тадзи кагуксӧ нимтан-омӧльтан. Сьӧкыд пельнас сійӧ сӧмын кывпомсӧ гӧгӧрвоӧма. Кӧть эськӧ рочысь пырӧм б...дь кывйыс и абу мат, сійӧ артмӧма «блудить» кывсянь.

Ӧні вот «ва коми» дор сулалысьяс зільӧны вуджӧдны быд роч кыв. Ставсӧ вуджӧдасны да коркӧ, гашкӧ, и матӧдзыд воасны, сійӧс кутасны бергӧдлыны ас ногыс. Интереснӧ, кыдзи мӧдасны юргыны коми кывворӧ дзикӧдз нин вужъясьӧм роч видчӧмъяс, кор прӧстӧй «форточка» «ва коминас» лоӧ «лёк дук петан розьӧн»...