БӦРЙЫ, МЫЙ КОЛӦ

Кулӧмдінын медводдзаысь муніс видз-му ярманга. Культура керкаводзса изэрд вылын асывсяньыс ассьыныс вузӧссӧ паськӧдісны крестьянскӧй (фермер) овмӧсъясысь да СПК-ясысь войтыр.

Позис ньӧбны быдторсӧ — йӧв и вый, яй и сыр. Ставыс тані, ас районын, вӧчӧм. Сӧмын калбасӧн да шашлыкӧн вузасис Сыктывкарса яй комбинат. Зэв уна ньӧбасьысь матыстчылісны бӧрйыны «Пожӧг», «Помӧсдін» видз-му овмӧс кооперативъяслысь, «Колос» да «Рассвет» фермер овмӧсъяслысь, нянь пӧжалан заводлысь вӧчӧмторсӧ. А донъясыс эз нин сэтшӧм гырысьӧсь вӧвны: порсь яй килоыс 150–160, мӧс яй — 130 шайта. Капуста, морков, картупель, чеснӧк, свеклӧ, петрушка — ставыс карын дорысь донтӧмджык. А «Колос» овмӧс кутысь Ольга Ракина вӧзйис тшӧтш порсьпиянӧс.

Кыдзи висьталӧ районса видз-му овмӧс управлениеӧн веськӧдлысь Изосим Степанович Попов, татшӧм ярмангаясыс юрсиктын лоӧны и водзӧ. Ӧти-кӧ, йӧзыслы кивыв ӧтилаысь став колана вӧлӧгасӧ ньӧбны, мӧд-кӧ, вӧлӧга вӧчысьяс ӧдйӧджык да бурджыка иналӧны ассьыныс тӧвар-вузӧссӧ.