ПРӦСТ КАДТӦ КӦ КУЖАН КОТЫРТНЫ
Быдӧнӧс, уджсьыс ӧтдор, мыйӧкӧ да мыйӧкӧ кыскӧ. Кодкӧ вӧралӧ, кодкӧ вӧчасьӧ, кодкӧ мыйкӧ чукӧртӧ прӧст кадас. А Кулӧмдінысь И. Г. Мишарин и уджсӧ, и шойччӧгсӧ йитӧ физкультуракӧд да спорткӧд. И оз сӧмын сы вӧсна, мый ичӧтсянь «сирасис» лызь дорӧ да школаын на велӧдчис бура ворсны мачӧн волейболысь, баскетболысь, футболысь. Мортыслы спортыс йиджтысьӧма нин вирас, сытӧг овны оз вермы.
Иван Георгиевич вылӧ видзӧдӧмӧн олӧмас татшӧм туйвизь босьтіс и семьяыс. Позьӧ шуны, налӧн быдса спортивнӧй династия: став сикас ордйысьӧмсӧ котыртлӧны да асьныс тшӧтш сэтчӧ пырӧдчӧны. И Валентина Ивановна гӧтырыс, и Екатерина да Татьяна нывъясыс, Иван внукыс, Елена Георгиевна чойыс. Нуӧдны кӧ районын медся спортивнӧй семья ним вылӧ конкурс, Мишаринъяс быть петасны медводзӧ.
Ӧні Иван Георгиевич пенсия вылын нин. Паськыд пельпомъяс саяс физкультураын да спортын кузь туй: Ижевскын Удмуртияса канму университет, ас сиктса школаын физкультураӧ челядьӧс 2 во чӧж велӧдӧм, армия, ДЮСШ-ын 6 во тренералӧм. Та бӧрын индісны челядьлӧн да томуловлӧн тайӧ школаас веськӧдлысьӧн. Вӧлі и районса администрацияын физкультура да спорт юкӧнса веськӧдлысьӧн. Мыйта ордйысьӧм, спортивнӧй гаж котыртліс Иван Георгиевич! Районын сы дырйи спортыс збыльысь кыпавліс, тренерлӧн сойборд улысь петісны эз сӧмын Комиса, но и Россияса чемпионъяс. Эз ӧд весь сетны мортыслы «Физкультураын да спортын отличник» пас, коді лои мукӧд уна сикас награда дорӧ содтӧдӧн. Ӧд Мишарин ачыс зэв зіля петавліс став тшупӧда ордйысьӧм вылас — районын и республикаын.
Спорт юкӧнын уджалӧм йывсьыс Иван Георгиевич сёрнитӧ оз кольӧм кадын. Сійӧ и ӧні нырщикалӧ став сикас ордйысьӧмас, кодъясӧс нуӧдӧны районын. Ачыс на веськӧдлӧ «Надежда» клубӧн, котыртӧ Носимса лыжнӧй базалысь удж. Сылӧн водзмӧстчӧмӧн артмис «Носимса Альпы» нималана трасса, кытчӧ лызьӧн котравны, «ватрушкаясӧн» исласьны волӧны оз сӧмын районса войтыр, но и суйӧрсайса гӧсьтъяс. Сідз, бӧръя кадас Эжва йывса гӧраяслысь мичлунсӧ, трассаыслысь аслыспӧлӧслунсӧ донъялісны Германияысь да Израильысь туристъяс. А гожӧмнас И. Г. Мишарин да сылӧн семьяыс пыр велосипед да байдаркаяс вылынӧсь. Тшӧкыда найӧс позьӧ аддзывны Кадамысь, кытчӧдз подаыслы писькӧдчыны сьӧкыд, а Мишаринъяс пырӧны велосипедӧн да нӧшта ичӧт челядьсӧ босьтлӧны.
— Быдӧн, коді кӧсйӧ, вермас пуктыны пай дзоньвидзаджык, интереснӧйджык олӧм лӧсьӧдӧмӧ, — пасйӧ Иван Георгиевич. — Прӧст кадтӧ кӧ кужан котыртны, челядь вунӧдасны весь бовъялӧм да вильшасьӧм, а верстьӧяс — юӧм-кодалӧм йылысь.
