БОСЬТӦНЫ ТШАК ДА ВОТӦС. А КӦНІ ДА КЫДЗИ?

Кыдзи шоныд небыд зэр бӧрын тшак гузьгысьӧ-петӧ, сідзи и тшаксӧ да вотӧссӧ примитысьыс йывмӧ. Кулӧмдін районса юралысь С. П. Каплинлӧн тшӧктӧм серти сикт-посёлокъясӧ ветлісны торъя комиссияяс, кодъяс донъялісны примитчанінъясын уджсӧ санитарно-гигиеническӧй да оланпасъясын урчитӧм мукӧд норма серти.

Ӧти комиссияас (ӧні татшӧмыс кык) пырисны Роспотребнадзор юкӧнын, ОВД-ын, районса да сиктъясса администрацияясын уджалысьяс. Август-сентябрын налӧн син улӧ веськаліс тшак-тусьсӧ 38 примитанін, тшаксӧ 2 косьтанін да 1 пуанін. 25 примитчысь вылӧ гижисны протокол. Пӧшти быдлаын ёна торкалӧны санитарно-гигиеническӧй правилӧяссӧ. Вӧрса озырлун босьтысьяслӧн абуӧсь медицинскӧй книжкаяс, сангигиеническӧй велӧдчӧм йылысь удостоверение. Уналаын, кытчӧ йӧзыс вайӧны сдайтны тшак да вотӧс, абуӧсь весиг лӧсялана стрӧйбаяс, гӧгӧрбок няйт да лӧп-ёг, ящикъяссьыс дзескыд. Примитчысьяс эз вермыны петкӧдлыны заптысьысь предприятиеяскӧд договоръяс («Парма Холод», «Белком» да «Матреко Холод» фирмаясӧ пырысьясыс кындзи), а сідзжӧ прӧдукция да кӧдзӧдан установкаяс вылӧ сертификатъяс. Мӧд комиссияыс, кытчӧ пырисны потребительяслысь правояс дорйӧм да мортлысь дзоньвидзалун видзӧм кузя надзор федеральнӧй службалӧн районса юкӧнын, райадминистрацияын, право доръян тэчасъясын уджалысьяс, кык тӧлысьнас воліс дас витлаӧ. Тыдовтчис, мый быдлаын ёна торкалӧны санитарнӧй нормаяс. Сідз, санитарно-эпидемиологическӧй кывкӧртӧдтӧг тшаксӧ ӧдйӧ кынтӧны, косьтӧны, пуӧны Кулӧмдінысь «Аура», «Родник» ООО-яс , Тымсерысь асшӧр предпринимательяс Лукин Ю. В да Барсуков Е. Ю., Кебанъёльысь ас вылӧ уджалысь Е. Б. Грищенко, Мысса сельпо. Уналаын оз видзӧдны сӧстӧмлун бӧрся, уджалӧны торъя паськӧмтӧг. На лыдын «Парма-Холодлӧн» Лопъювадса примитчанін, бара жӧ Тымсерысь «Е. Ю. Барсуков» ИП. Кӧнсюрӧ медалӧны уджалысьяссӧ медициналӧн кывкӧртӧдтӧг, гигиеническӧй аттестациятӧг. Тайӧ Помӧсдінын «Москворечье» ООО, Кебанъёльын Е. Б. Грищенко,Тымсерын А. А. Паршуков. Тырмытӧмторъяссьыс лои кыскӧма административнӧй кывкутӧмӧ дас нёль мортӧс. Шуӧма перйыны штрапсӧ 26.100 шайт. А «Родник» да «Аура» ООО-яс кузя кабалаяссӧ ковмис мӧдӧдны судӧ, мед дугӧдны налысь уджсӧ.

Кыдзи пасйӧ тайӧ комиссиянас юрнуӧдысь Л. Ю. Савельева, овмӧдчанінъясӧн веськӧдлысьяслы колӧ сюсьджыка видзӧдны асланыс сикт-посёлокын тшак-вотӧссӧ примитӧм да переработайтӧм бӧрся, а казяласны кӧ оланпас торкалӧмсӧ — ӧдйӧджык юӧртны та йылысь Роспотребнадзорӧ.

Районын уна уджтӧмалысьыс, йӧзыс олӧны гӧля. Вӧрса озырлуныс сетӧ налы позянлун бура нажӧвитчыштны.

— Та вӧсна, — шуӧ районса юралысьӧс первой вежысь Л. Н. Колесникова, — ми видзӧдалам примитчанінъяссӧ ог найӧс тупкӧм могысь, а мед вӧлі кырымалӧма сэні уджалысь быд морткӧд сёрнитчӧм, мед артавсис сылӧн уджалан стажыс, мед вӧлі мынтӧма районса бюджетӧ вот.

Став тайӧ прӧверкаыслы кывкӧртӧд вӧчигӧн октябрын районса администрацияын пасъясны медбур примитчысьсӧ, заптысьысьсӧ да примитчанінсӧ. Тӧд вылӧ босьтасны, кыдзи тайӧ уджалысьясыс пыдди пуктісны сангигиеническӧй нормаяс да мукӧд оланпас.