ТОМУЛОВ ДУРӦНЫ?

Юрсиктса «Агиевскӧй» лавкалӧн ывла стенын дыр ӧшаліс вушйӧм гижӧда пӧв, код вылӧ шензьӧмпырысь видзӧдісны ветлысь-мунысьяс. «Товары для детей» гижӧдсьыс «о» шыпасыс усьӧма, а «ы»-ыслӧн «чегӧма кокыс», и артмӧма мисьтӧмкодь кыв. Пӧвйыс и ӧні на ӧшалӧ, сӧмын кодкӧ гӧгӧрвоӧма жӧ гирсйыны шыпасъяссӧ.

Тайӧ, став сертиыс, челядьлӧн дурӧм, вӧчисны шмонитігмоз. Но позьӧ-ӧ шуны дурӧмӧн томуловлысь «серпасъяссӧ», кодъяс син улад усьӧны медся йӧзаинъясын. Кутшӧм сӧмын гижӧд он аддзы керка стенъясысь. Тыдалӧ, пемыднас уджалӧны, луннас эськӧ эз лысьтны.

«А тэ весалін ассьыд уличтӧ хачьясысь?» — юасьӧ краскасӧ жалиттӧг ӧтувъя пывсян стенын гижӧдӧн кутшӧмкӧ «партриот» да сэні жӧ чуксалӧ: «Рочьяс, водзӧ!»

Нянь пӧжалан заводын татшӧм жӧ «патриотическӧй» гижӧдъяс: «Россиялы слава!» да «Чуркаяс, мунӧй татысь!» Тасянь туй вомӧн вуджан — и школа. Сылӧн стенъясас тӧдчӧны на жӧ быд сикас гижӧдыс, кӧть и вылітіыс мавтӧмаӧсь-сайӧдӧмаӧсь краскаӧн. Да мый сэн школаыд, весиг районса администрациялӧн стрӧйбаын ӧти пельӧсӧ сибавлӧмаӧсь «художникъясыд», думсьыныс «мичмӧдӧмаӧсь» кафеӧ пыранін.

Коді тадзисӧ вӧчӧ, мый ради — некод оз туяв. Эмӧсь ӧд милиция, меставывса администрация, коммунальнӧй овмӧс, кодъяс кывкутӧны сиктын пӧрадок вӧсна. Эмӧсь и бать-мам, кодъяс казявтӧг оз овны рытъяснас ныв-пиныслысь вошласьӧмсӧ, а, колӧкӧ, и краскаяс, резсян баллонъяс ньӧбалӧмсӧ. Юасьлӧны-ӧ, мый вылӧ найӧ?

Веськыда кӧ, оз на сідзи майшӧдлы ачыс гижасьӧмыс, кыдзи гижӧдъясыслӧн вежӧртасыс. Сэтысь и татысь аддзан свастика «SKІN» кырымпас. Миянӧ нин воис Москваса да Санкт-Петербургса скинхедъяслӧн «висьӧмыс»?

Шӧр школадорса гараж ӧдзӧсын синтӧ желлялӧ ыджыд свастика. А орччӧн, сэні жӧ, сійӧ жӧ красканас — «Миру мир любой ценой» чукӧстӧм. Кодкӧ ылӧсас серпасаліс-гижис, мый воис юрас, али водзвыв мӧвпыштӧмӧн? Ӧнія том йӧзлысь быд сикас видеоыс да интернет сідзи гудыртӧны вежӧрсӧ, мый найӧ вермӧны йитны ӧта-мӧдыскӧд дзик лӧсявтӧмтор.