ПЕТАВЛА ВУГРАСЬНЫ ӦШИНЬ УЛӦ
Кӧрткерӧсса олысь Станислав Николаевич Коюшев, ковмас кӧ свежӧй чери, мунӧ оз ю вылӧ, а дачаас. Сэні сылӧн и кыйсяніныс. 10 во сайын град вылас Станислав Николаевич кодйӧдіс тракторӧн 11 метр кузьта да 6 метр пасьта гуран. Пӧлӧсӧн мунысь да вочасӧн джудждысь пыдӧсыс вӧлӧма ключьяса, ваыс пыр и воис. И мый бурыс — эз гудыртчы, тӧвъяснас дзикӧдз эз кынмав, ӧд джудждаыс воӧдчыліс 2,5 метрӧдз.
Медводдза тӧлыс, дерт, повзьӧдліс: оз-ӧ муӧдзыс камгы-кынтав. Но йиыс метр джын и вӧлі. Кӧзяин помся писькӧдаліс розьяс, нуліс васӧ донъявны санэпидстанцияӧ. А ваыс вексӧ вӧлі сӧстӧм. Сідзкӧ, ышӧдіс асьсӧ С. Н. Коюшев, татчӧ лэдзӧм арпиян оз пагавны. Сідзи и лоис, тулыснас тыдовтчис, мый ас вӧчӧм тыыс «ловъя». Май заводитчигӧн ваыс шоналіс 10–15 градусӧдз, и том коз лапъясысь вӧчӧм колясын заводитіс кульмыны лэдзӧм чери. Тӧлысь шӧрас нин кутісны жуны ва веркӧсас ичӧтик ёспиян. Но таӧдз, кор апрель помын йиыс шыӧн мӧдіс сывны, прудйыс ӧдйӧ ойдіс, и ковмис ортсӧ лэдзны васӧ матӧ 20 кубометр. Чери рӧдмӧдысь сэки гӧгӧрвоис, мый колӧ вӧлі кыпӧдны берегъяссӧ.
Вочасӧн кельчияс быдмисны 3–4 сантиметр, гычьяс 5-сянь 8,5 сантиметрӧдз. Куим во мысти ты пыдӧсын тыдовтчисны посни быдмӧгъяс, воис кутшӧмсюрӧ гаг да лоис мый сёйны эзысь да зарни сьӧмаяслы. Дерт, нянь да мукӧд кӧрымтӧг найӧ эз жӧ кольлыны.
Сэк, кор чериыс буракодь нин рӧдмис, видлісны кыйны шатинӧн. Шедіс ӧд! Весиг гыч пысасис вугырӧ. А сэсся, медым стӧча тӧдмавны, кыдзи рӧдмисны быдтасъясыс, прудӧ лэдзисны тыв. Ӧтчыд тывйыштӧмнас шедіс 25 гыч, ставыс ки пыдӧс пасьта.
— Талун тыыс дзескыд нин сэні олысьяслы, — шуӧ Станислав Николаевич Коюшев. — Уналы, кодъяс тшӧтш босьтчисны рӧдмӧдны черисӧ, ме сеталі зарни да эзысь гычьяс. А прудъясыс, Кӧрткерӧсысь ӧтдор, эмӧсь Позтыкерӧсын, Пезмӧгын, Приозёрнӧйын. Аддзӧны йӧзыс, мый эм водзӧсыс, да быд во кодкӧ да кодкӧ босьтчӧ миян тайӧ выль сикас овмӧссӧ лӧсьӧдӧмӧ.
С. Н. Коюшевлӧн висьталӧм серти, 15 во сайын сиктса олысьяс кутчысьлісны вӧчны Эжва вомӧн посдорса карьерӧ пруд сямаӧс жӧ. Гектар джын угоддьӧӧ лэдзисны ёспиянӧс, кытсюрӧ лӧсьӧдыштісны берегъяссӧ. Но уджыс вочасӧн эндіс — некод кӧзяинӧн лоны эз кӧсйы, а унанад сэтшӧм тай и дӧзьӧрыд да тӧждыд. И век жӧ, Енмыс кӧ шуӧма рӧдмыны, падмӧдны ловъя ловъясӧс нинӧм нин оз вермы. Ӧні тайӧ ыджыдсьыс-ыджыд гуранас олӧны гыч, ёкыш да весиг налим.
— Ме прудсӧ вӧчи медсясӧ мичлун ради, — тӧдчӧдӧ сиктсайса дачалӧн кӧзяин, — мед волыны татчӧ да пукалыштны ас мӧвпъясӧн ва дорас, любуйтчыштны гӧгӧртаснас. А, вӧлӧмкӧ, позьӧ на и лов кокньӧд босьтӧмысь ӧтдор кутшӧмкӧ да выгӧда шедӧдны. Кӧть нин ас семьяӧс чериӧн могмӧдӧмнас. Кодкӧ, колӧкӧ, ме ног босьтчӧмӧн, ёна ыджыдджык пруд лӧсьӧдас, весиг некымынӧс, быдса чери овмӧс котыртас. Майбыр, позянлуныс быд сикт-посёлокын эм. Сэки ог нин кутӧй усьласьны лавкаын тӧлысьясӧн куйлысь чорыд кыша путассу да нильсмунӧм минтай вылад.
