ВОЧАСӦН СОДТАМ ЗАПТЫСЯН ӦД
Таво Вылыс Эжваын вӧр заптӧны 25 предприятие да 68 асшӧр уджалысь, кодъяс оз лоны сідз шусяна юридическӧй лицоясӧн. Став уджалысьыс 1.817 морт. Вӧр угоддьӧяссӧ кӧртымалӧ 8 предприятие, на лыдын тшӧтш и ӧти асшӧр уджалысь.
Кӧртымас сетӧма 1.587 сюрс кубометр, либӧ пӧрӧдчан угоддьӧясысь 41 прӧчентсӧ. Таысь ӧтдор вӧр юклан 12 аукцион вылӧ петавлісны 11 предприятие да 19 асшӧр уджалысь, кодъяс босьтісны 108,6 сюрс кубометр.
Эжва йывса вӧр лэдзысьяс, позьӧ шуны, эз лёка уджавны 2007 вося январь — августас. Кыскӧма 634,9 сюрс кубометр, мый 8,2 прӧчентӧн унджык кольӧм вося тайӧ кадын серти. «Монди Бизнес Пейпа Сыктывкарса ЛПК»-лӧн предприятиеяс кыскисны 4.000 сюрс гӧгӧр кубометр, кольӧм восяысь пӧшти 10 прӧчентӧн унджык. 2003 восянь СЛПК-лӧн содтысьӧм медводдзаысь лоис и вӧр заптӧм кузя (кольӧм волӧн тайӧ кадын серти 30,8 прӧчентӧн унджык). Ытва дырйи СЛПК-лы мӧдӧдӧма 185 сюрс кубометр краж, мый унджык жӧ мукӧд воын серти. Делӧвӧй вӧр вӧчӧм кузя водзын мунӧны «Немлес», «Вылыс Эжва», «Комилесбизнес», «Тимшерлес» ООО-яс. Сідз, «Немлес» сӧмын августын татшӧм вӧрсӧ вӧчис 8,1 сюрс кубометр, а кӧкъямыс тӧлысьӧн кольӧм волӧн тайӧ кад сертиыс 135,6 прӧчент. То сэні, то тані тшак моз «мыччысьӧны» пилорамаяс. Ӧні районын татшӧмыс 60 гӧгӧр, и нӧшта на содас. Содӧ и пиломатериал вӧчӧм. Кольӧм воын серти бруссӧ, тьӧс-плакасӧ ООО-яслӧн да асшӧр уджалысьяслӧн станокъясӧн лэдзисны 11 прӧчентӧн унджык (матӧ 50 сюрс кубометр). Медуна вӧчисны «Комилесбизнес» ООО, «Белый В. В.» ИП. А «Фора» ООО, лыдпасъяслы кӧ эскыны, кольӧм вося тайӧ кадын серти пиломатериалсӧ лэдзис кык пӧв уна. Но тані колӧ кутны тӧд вылын, мый мӧйму «Фора» (ӧні «МарКо») уджаліс тӧдчымӧн слаба, 8 тӧлысьнас лэдзис сӧмын 1 сюрс кубометр пиломатериал.
Вӧр заптӧмын ӧдъяс содтӧм вылӧ ёна тӧдчис выль технологияяс пыртӧм. Районын ӧні пыр уджалӧ 11 финскӧй комплекс. Сы лыдын «Немлесын» да «Эжвалӧн» филиалын харвестерыс да форвардерыс 1 гозйӧн, «Мобильный лес», «Комилесбизнес», «Локчимлес» ООО-ясын — 2 комплексӧн, а «Леском» пӧдса акционер котырын — 3. «Эжваын» 2 комплекс нӧшта босьтісны кад кежлӧ. Тайӧ тӧлысяс нин «Тимшерлесын» да «Немлесын» виччысьӧны морт ӧтиӧн выль комплекссӧ. Во помӧдз ӧтиӧс жӧ ваясны «Вылыс Эжваӧ».
Быд во, торйӧн нин рӧспута дырйи, предприятиеяслысь уджсӧ ёна падмӧдӧны омӧль туйяс. Делянкаясӧ он сибав, кыскасян техника няйт пиад помся жугласьӧ. Таво вӧр овмӧсъяс унджык вын веськӧдісны туйяс вӧчӧм вылӧ. «Немлес» нюжӧдіс во гӧгӧр ветлансӧ 5,8 километр, «Эжвалӧн» филиал — 2,1, «Комилесбизнес» — 2,5, «Леском» — 4,2, «Локчимлес» — 4 километр. Ставсӧ кӧкъямыс тӧлысьӧн предприятиеяс ас вынӧн вӧчисны 18,6 километр. Во помӧдз 5 да джын километр нӧшта лоӧ помалӧма «Вылыс Эжва» ООО-ын. Тайӧ абу этша, кутны кӧ тӧд вылын, мый овмӧсъясын водзті моз абуӧсь туй вӧчан торъя юкӧнъяс.
«МБП СЛПК»-лӧн отсӧгӧн таво аслыс зэв бур вуджанін вӧчис «Тимшерлес». Мыс сикт весьтын Эжва вомӧн сійӧ нюжӧдіс понтон. Татшӧмыс республикаын сэсся ӧдвакӧ эм. А вайисны сійӧс кузяла ва туйӧд, первой Войвыв Двинаті, сэсся Эжваті. Ковмыліс весиг мездывлыны Немдін горулысь понтонсӧ, мед буксирӧн вайны дзик местаӧдз. Ӧні «Тимшерлеслӧн» эм позянлун заптысьны Эжва мӧдлапӧлын, Мысладорын во гӧгӧр чӧж.
Кывкӧртавны кӧ, районса вӧр овмӧс вочасӧн пыр зумыдджыка сувтӧ кок йылас. Улыс складъясын да делянкаясын уджалысьяскӧд аддзысьлігӧн казялан: йӧзыс кызвыннас гӧгӧрвоӧны, мый колӧ содтыны вӧр заптан ӧдъяс. Та сайын — налӧн нажӧтка, ставнас районлӧн тыр-бур олӧм. Та сайын и сикт-посёлоклӧн аскиа луныс, ӧд вӧр овмӧсыд — экономикалӧн подув.
