ИЧӦТ ГРЕЗДӦ — ЮГЫД БИ

Октябрлӧн медводдза лунъясӧ Пузлаын пасъясны Кулӧмдін районлӧн, да и ставнас республикалӧн энергетическӧй овмӧсын зэв тӧдчана лоӧмтор. Эжва йывса медылысса посёлокӧ воис государственнӧй би.

Вӧльдінсянь Пузлаӧдз линиясӧ, сюръяяс сувтӧдалӧмнас, кык гӧгӧр тӧлысьӧн и нюжӧдіс Сыктывкарса 101-ӧд мехколонна. Тайӧ 35 километра участокыс сувтіс 12 миллион сайӧ шайт дон. Бӧръя сюръясӧ посёлокӧ сувтӧдісны кольӧм вежонын нин. Вӧчис тайӧс С. А. Кузнецовлӧн бригада, коді сэсся босьтчис нюжӧдны линиясӧ Вӧльдінсянь воысь А. А. Вьялковлӧн бригадалы воча. Аски-талун найӧ ӧтлаасясны.

Колӧ шуны, мый республика бӧръя кадас ёнджык кутіс отсасьны ылі районъясын энергетика сӧвмӧдӧм кузя. Эжва йылын жӧ 24-ӧд мехколонна ӧні стрӧитӧ Помӧсдін — Войвож 110 киловольта линия. Сійӧс помалӧм бӧрын артмас ён энергетическӧй кытш, коді сетас позянлун район пыр нуӧдны и Сыктывкарсянь, и Ухтасянь воысь государственнӧй би.