ЮРАЛЫССЯНЬ КОЗИН

Кулӧмдінысь Казариновъяслӧн семья тавося июльын шыӧдчыліс республикаса Юралысьӧс вежысь Ирма Кутаева дорӧ аслыспӧлӧс могӧн.

Налӧн Женя пиныс ичӧтдырсяньыс инвалид. Батьыс, Иван Михайлович, ывла вывті новлӧдлӧ сійӧс коляскаӧн. Зонка 1 классянь велӧдчӧ гортас, но сэтшӧм жӧ программа серти, кутшӧмӧс урчитӧма и школаын. Сылы зэв ёна колӧ компьютер, коді эськӧ тӧдчымӧн кокньӧдіс зонкалысь быд лунъя уджсӧ, отсаліс сӧвмӧдны вежӧрсӧ, сетіс позянлун не кольччыны ас коддьӧмсьыс.

И со сентябрь шӧрын Казариновъяс ордӧ воліс районса юралысь Сергей Каплин. Сійӧ тӧдмасис семьялӧн олӧм-вылӧмӧн да торйӧн нин дыр сёрнитіс Евгенийкӧд. А сэсся сетіс детинкалы дыр виччысянаторсӧ — выль сикас компьютер. Тайӧс пӧ тэныд мӧдӧдіс ачыс республикаса Юралысь Владимир Торлопов.

Гӧгӧрвоана, кутшӧм рад вӧлі том морт, ӧд збыльмис сылӧн ыджыд кӧсйӧмыс. Бать-мамыслы эськӧ ёна дыр ковмис чӧжны сьӧмсӧ татшӧм донатор вылад.

Казариновъяс пӧся аттьӧалӧны Владимир Торлоповӧс, Ирма Кутаеваӧс да КР-ысь «Республикаса Юралысьлӧн общественнӧй приёмнӧй» ГУ-лӧн районса юкӧнӧн веськӧдлысь Антонина Кузнецоваӧс налысь тӧждсӧ гӧгӧрвоӧмысь да каганыслы отсӧгысь.

* * *

Редакциясянь: Тайӧ лунъясӧ жӧ «Коми му» редакцияӧ письмӧӧн шыӧдчисны асьныс Казариновъяс. Корисны миян газет пыр аттьӧавны республикаса Юралысь Владимир Александрович Торлоповӧс, сійӧс вежысь Ирма Альбертовна Кутаеваӧс, КР-са Юралысьлӧн общественнӧй приёмнӧйлӧн Кулӧмдін районса юкӧнӧн веськӧдлысь Антонина Анатольевна Кузнецоваӧс налӧн Евгений пилы татшӧм бур козинсьыс да йӧз вӧсна тӧждысь.