ЭН Ю — КӦЗАПИӦН ЛОАН

Кулӧмдін кывтыдын да Пожегодскӧй улича вылын вель уна олысь кольӧм воын керкааныс сюйисны ва.

Кӧть эз донтӧм сувт бетон кольчаяс, труба-кран ньӧбӧмыс, но йитчисны ӧтувъя ва локтанінас уна дас овмӧс. Кодсюрӧ, мед рӧскодыс вӧлі этшаджык, траншеяяссӧ кодйисны асьныс, кольчаяс пыдди гуас сюялісны ыджыд машина гӧгыльяс. И удж вылас, дерт, ӧтувтчылісны некымын овмӧсӧн.

Дыр нин муніс сёрни и юрсиктлӧн катыдпомӧ ва нюжӧдӧм йылысь, ӧд водопроводыс мунӧ тасянь матын. Сьӧмыс пӧ та вылӧ администрациялӧн эм, кӧть и 2007 во кежлӧ овмӧдчӧминлӧн бюджетыс кольӧм восяысь этшаджык — 9.413, 4 сюрс шайт.

Весиг урчитісны вӧчан кадсӧ — таво гожӧм. Но шоныд пӧраыс коли, а ва эз во. Катыдпомсаяс, Северная, Южная, Средняя да Мелиораторъяслӧн уличаяс вылын олысьяс юанторсӧ босьтӧны важиник струбаясысь. Да и татшӧмыс сӧмын гоз-мӧд. Кӧнсюрӧ ваыс дзик гудыр. А паськалас кӧ кутшӧмкӧ висьӧм? Санэпидстанция эськӧ ӧлӧдлӧ жӧ шогмытӧм васӧ босьтӧмысь. Но йӧзыслы воштысьнысӧ некытчӧ, ӧд абу на быдӧнлӧн машинаыд, мед флягаӧн ваявны юанторсӧ ылысса кранысь.