ПИСЬКӦС МОРТЫД ТУЙТӦ АДДЗАС
Енмыс кӧ пӧ сетӧ мортлы енби, то векджык уна пӧлӧс. Шуам, физик вермас лоны лирикӧн, медик — композиторӧн. Олӧмас тай абу ӧти татшӧм примерыс. Менам вӧвлӧм велӧдысьӧй ӧтмоза бура ворсіс баянӧн и серпасасис, вит чуньсӧ моз тӧдіс техника и гижис мича висьт-повесьтъяс, мастер моз вӧчасис пуысь и нуӧдіс черчение урок. Татшӧм жӧ и уджъёртӧй, код йылысь кӧсъя висьтыштны.
Став Коми муын ливкйӧдлӧны «Зиль-зёль» сьыланкыв:
Зиль-зёль кӧнкӧ кылӧ,
Зиль-зёль, вошӧ дой,
Татшӧм миян олӧм-вылӧм:
Талун сатин, аски ной.
Гижис сійӧс Помӧсдінын олысь аслыссикас морт — Александр Васильевич Шебырев. Образование сертиыс экономист, сійӧ, позьӧ шуны, кужӧ олӧмас быдторсӧ. Гортсяньыс, ичӧтик Пожӧгдін грездсянь, эз повзьы да муніс Сыктывкарса канму университетӧ, медся сьӧкыда веськалан факультетӧ, и помаліс зэв бура.
Локтіс уджавны Пожӧг совхозӧ специальносьт сертиыс, босьтчис делӧас профессионал моз. Сы дырйи овмӧсыс нималіс республика пасьта. А сэсся сюсь морттӧ казялісны районын, корисны уджавны сэтчӧ, и эз кодӧнкӧ, а ВЛКСМ райкомса первой секретарӧн. Сэки ми, газетса уджалысьяс, тӧдмалім, мый Александр гижӧ кывбуръяс. Дыр «гӧтралім» гижан уджын гӧгӧрвоысь морттӧ редакцияӧ, корим, мед видлас вынсӧ и журналистикаын. И локтіс ӧд. Производствоын гӧгӧрвоысь морттӧ пыр и пуктісны отделса веськӧдлысьӧн. И статьяяссӧ первойсяньыс гижис бура подулалӧмӧн, ставсӧ гӧгӧрбок донъялӧмӧн: кӧть вӧр, кӧть видз-му овмӧс кузя. Ӧд мый-мый, а лыдпасъяснад сійӧ кужӧ уджавны. Сэсся и йӧз дорад велалӧма нин вӧлі сибавны, а тайӧ журналистыдлы медтӧдчанаыс.
Регыд мысти нин Сашаӧс индісны главнӧй редакторӧс вежысьӧн. Сэки сійӧ ёна нин йӧзӧдаліс кывбуръястӧ, но торйӧн нин бура артмисны серамбана висьтъяс. Нинӧм абусьыс думыштас сэтшӧм серпас, мый он кӧсйы да вак-вакӧн сералан.
Но сиктса морттӧ сиктӧ и кыскис. Ӧвтыштіс ыджыд удждон вылӧ да кайис овны гӧтырыслӧн чужанінас, Помӧсдінӧ. Тыдалӧ, сэтшӧм нин сійӧ мортыс: кӧсйӧ видлыны олӧмсьыс быд выльторсӧ. Сьӧкыдлунъяс вылӧ видзӧдтӧг. Ӧд сійӧ жӧ Помӧсдінас оланіныс на эз вӧв. Уджаліс газетын собкорӧн и ӧттшӧтш стрӧитчис. Терем кодь керка лэптіс, зумыд овмӧс гӧтырыскӧд лӧсьӧдісны.
Ёртлӧн удж-олӧм йылысь нюжӧдчӧмӧн висьтала сы могысь, мед тӧдчӧдны: писькӧс мортыд некор оз вош, век аддзас петан туй. Лоис сідз, мый газетысь Саша муніс. А кытысь корсян уджтӧ выльлаад, кор гӧгӧрбок нин ыджыдаліс уджтӧмалӧм? Этш сертиыс оптимист, эз усь сьӧлӧмнас, сэсся и талантыс отсаліс, кывбур-сьыланкывъясыс кутӧдӧн вӧліны. Вунӧді казьтыштны, сійӧ тшӧтш и гижӧ мичасьыс-мича шыладъяс аслас кывбуръяс дорӧ. Гортас аддзысьлігъясӧн босьтас гитарасӧ да ворсӧмнас сьӧлӧмтӧ сывдӧ. Некымын небӧгын да диск вылын нин сьыланкывъясыс петавлісны. А «Василей» гаж дырйиыд кыдзи петкӧдчис: быттьӧ сцена вылын и чужӧма.
Ӧні Александр Шебырев — Тима Вень нима музейӧн веськӧдлысь. Шензян, кыдзи сӧмын быдласӧ удитӧ. Ӧд музеяд уджыд зэв кывкутана. Но ӧд нӧшта на кружокъяс нуӧдӧ. Сылӧн «Росток» («Петас») нима литературнӧй котырыс важӧн нин нималӧ район пасьта. Сэтшӧм быдтасъяс, кыдзи Артур Уляшев, Яна Ефремова, Лиза Прошутинская да и мукӧд тшӧтш ас мозыс жӧ оз вошны олӧмад. Налы отсавны кутас поэзия, код дорӧ пестіс муслунсӧ мастерныс.
Коркӧ Саша висьтавліс, мый сьӧлӧм вӧрзьӧдмӧн пӧ лои, кор армияӧ нин ветлысь быдтасыс медводз локтіс велӧдысь дорас да копыртчывліс, аттьӧ пӧ урокъяссьыд, учитель. Ӧд литература дорӧ сибӧдігӧн мортсӧ туйдан сӧмын бур вылӧ, велӧдан аддзыны весиг ӧнія гажтӧм олӧмсьыс мичлун.
Поэзия-прозаын зільӧмысь, ӧтувъя уна небӧгын да «Войвыв кодзув», «Арт» журналъясын йӧзӧдчӧмысь Александр Шебыревӧс кад нин примитны Россияса гижысьяслӧн котырӧ. Тайӧ нӧшта на ышӧдас сійӧс творчествоын ыджыд вермӧмъяс вылӧ.
