ЁРТЛӦН ПАМЕТЬ ЛУН
Август 21 лунӧ Эдуард Алексеевич Тимушевлы тырис эськӧ 45 арӧс.
Сідзи артмис, мый ӧти лунӧ чужлім. Тшупӧда пас таво сылӧн. Но мортыс абу нин. Оз эскыссьы, мый Эдик абу орччӧн. Муна Кадамас — кыла сылысь гӧлӧссӧ. Лэчча Кулӧм ю вылӧ — сылӧн велӧдӧмтӧг оз жӧ коль: татчӧ писькӧд розьсӧ, татчӧ вӧйт, тані шедӧджык.
Кыдзкӧ другӧн муніс другӧй. Мукӧддырйиыс волас вӧтӧ, корӧ ас дорас. Кор стрӧка сюрас, кайлывлам эськӧ Керчомъяас, быть кежавлам гу вылас. Со неважӧн на Людмила гӧтырыскӧд да матыссаясыскӧд мавтім краскаӧн гу йӧр потшӧссӧ. А сэні, крест вылас — «Эдуард Тимушев, поэт...». Сійӧ збыльысь вӧлі поэт. Син водзын сӧвмис. Локтіс Немдінса школаӧ менамысь кыкӧн ичӧтджык классӧ кутшӧмкӧ детинка. Керчомъяысь пӧ. А ме гижа нин вӧлі школаса стенгазетъясӧ. Сійӧ жӧ локтіс да, кывсис, районса «Ленин туйӧд» газетын пӧ йӧзӧдчӧ. Вот завидьыд! Сэсся и ме гоз-мӧд кывбур мӧдӧді райгазетад. Недыр мысти воис письмӧ Василий Лодыгинсянь, школа помалӧм бӧрын пӧ лок татчӧ уджавны. Сійӧ кывкутысь секретарӧн вӧлі. Локті, а сэсся недыр мысти кыски ас дорӧ и Эдикӧс. Майбыр, олыштім сэки: ичӧтик жыр, пызан да вольпась, а йӧзыс мыйтаӧн волісны — быдлаын ветлан тай да быдӧн и тӧдӧ. Ӧти ӧти гӧрӧд разьӧ, мӧд — мӧдӧс. Кодсюрӧӧс весиг асьным эг тӧдӧй — сы ыджда районсьыд ӧд став олысьсӧ вежӧрад он коль. Эдик ставныслы аддзывліс лӧсялана кыв, велӧдіс, кыдзи корсьны петан туй, шуам, мортыс кӧ веськаліс судӧ, а кодкӧ и дзескыдінӧ. Писькӧс мортыдлӧн и кывйыс сюсь — пыр велӧдіс, кыдзи гижны сійӧ либӧ тайӧ шыӧдчӧм.
Эдик зэв ёна пыдди пуктывліс батьсӧ — Алексей Степанович Тимушевӧс, басня гижысьӧс, гудӧкӧн бура ворсысьӧс (Керчомъяад нӧ коді оз ворс!). Сылысь лунпасъяссӧ аслас коймӧд небӧг бӧрын и йӧзӧдіс (а таӧдз Эдуард Тимушевлӧн петавлісны нин «Крест» да «Видзӧдлас» небӧгъяс). Мӧвпалім-мӧвпалім, кыдзи юрнимавны небӧгсӧ да шуим, мед лоас «Помавтӧм сьыланкывйӧн». Тадзи и петіс Коми издательствоын.
Тайӧ книгасӧ лэдзтӧдзыс Эдик ёна на йӧзӧдчис. Мӧдӧдаліс кывбуръяс, пасйӧдъяс ас районса газетӧ, «Югыд туйӧ», «Войвыв кодзув» журналӧ, волісны весиг сысянь гижӧдъяс Свердловск обласьтсянь, кӧні служитіс армияын. Мыйсюрӧ, дерт, йӧзӧдлім районса газетын, сійӧ некор эз вунӧдлы ассьыс воддза уджаланінсӧ, уджъёртъяссӧ. Век гижис письмӧяс. Бӧръя кадас Э. А. Тимушев уджаліс «Коми му» газетын да «Коми гор» радиоын. Шензян вӧлі тайӧ мортыслӧн сямлуныслы. Петавлас гортсьыс — видзӧдан да сылӧн снимокыд дась нин и выль юӧрыд эм, кужис тай аддзыны йӧзыскӧд йитӧдсӧ. И зэв ӧдйӧ ставсӧ вӧчис. Эдикӧс, кыдзи мортӧс, ёртӧс, журналистӧс, поэтӧс некор ог вермы вунӧдны. Оз вушйы сійӧ и налӧн паметьысь, кодъяскӧд ӧтлаын уджавліс, кодъяслы эз ӧтчыдысь отсавлы.
