«ЗАРНИ СЬЫЛАН»

Помӧсдінын кык во сайын вӧлі лӧсьӧдӧма «Зарни сьылан» котыр. Ӧтувтчисны сэтчӧ школаын велӧдысь Елена Васильевна Игнатова да больничаын уджалысьяс: врач-лаборант Людмила Светозаровна Уляшева, фельдшер-лаборант Ольга Николаевна Макалюк, медсестраяс Эмилия Ивановна Ефремова да Вера Серафимовна Шебырева, фельдшеръяс Майя Ивановна Игнатова да Надежда Анатольевна Мартюшева.

Найӧ петкӧдлісны нин 28 концерт. Кыкысь вӧліны «Василей» вылын, гажӧдісны йӧзсӧ «Роч тӧв» фестиваль нуӧдігӧн, юркарса первой номера педколледжын Помӧсдінлы 300 во тырӧм, районса мукӧд сиктлысь юбилейяс пасйигӧн. Сьылісны тшӧтш «Юрган» ансамблькӧд, кодӧн веськӧдлӧ Скӧрӧдумысь нималана композитор Александр Егорович Уляшев. Репертуарас — коми да роч йӧзкостса сьыланкывъяс, эмӧсь и эстрадасаяс. Репетицияяссӧ котыртӧ да ворсӧ ачыс жӧ Александр Уляшев.

Коллективлы неважӧн вӧчис зэв бур козин Москваын Коми Республикалӧн представительствоӧн веськӧдлысь Степан Владимирович Игнатов. Буретш медицинаын уджалысьяслӧн лун кежлӧ мӧдӧдіс Тулаын вӧчӧм дона баян. Сэсся аслас водзмӧстчӧмӧн зэв колана инструментъяс вӧчӧдіс Кӧрткерӧс районысь Шойнатыса больничаысь главнӧй врач Александр Николаевич Игнатов. Бур сьӧлӧмӧн сійӧ сетіс ансамбльлы коми йӧзкостса ворсанторъяс: сюр-сяр, сярган, зиль-зёль да мукӧдтор.

Кор Пузлаын муніс «Вӧр лэдзысь–2007» конкурс да кӧні «Зарни сьылан» выступайтіс тшӧтш Выльгортса «Мича аньяскӧд», «Юрганкӧд», татчӧс посёлокса асшӧр артистъяскӧд, ми юалім ансамбльсалысь, кутшӧмӧсь мӧвпъясыс налӧн водзӧ вылӧ.

— Петкӧдчывны районса быд ыджыд гажын, — висьтасис сьылан котырса нырщик Л. С. Уляшева. — А сэсся творческӧй туйным нуӧдлас Москваӧ Коми Республикалӧн представительствоӧ, Финляндияӧ.

Кӧть и ӧні нин нималӧ «Зарни сьылан», сылӧн аскиа луныс нӧшта ыджыдджык лачаа. Ӧд котырын быдмӧны и том артистъяс. Школаын велӧдчысьяс Юлия Макалюк, Анастасия Козлова, Карина Игнатова, Ольга Игнатова ӧнісянь нин петкӧдлӧны ыджыд творческӧй сям. Сэсся пыр эм надея отсасьысьяс вылӧ. Шуам, кӧть кор оз шыӧдчывны «Комилесбизнес» ООО-ӧн веськӧдлысь Александр Светозарович Игнатов дорӧ, век мунӧ воча: то автобустӧ сетӧ, то паськӧм мичмӧдӧм вылӧ вӧзйӧ сьӧм. «Юрганӧн» веськӧдлысь А. Е. Уляшев репетицияяс вылӧ волӧ Скӧрӧдумсянь, а найӧ мукӧддырйиыс нюжалӧны вой шӧрӧдз. Александр Егорович ачыс гижӧ выль шыладъяс, ачыс ворсӧ, оз жалит бур делӧ вылӧ ассьыс аппаратурасӧ. Ӧтитор лёк, коллективлӧн абу репетиция нуӧданіныс. Концертъяс кежлӧ корсюрӧ дасьтысьӧны кодлӧнкӧ гортас. А ӧд котырас сьылысьясыс Помӧсдін гӧгӧрса вит сиктысь.

— Миянлы быть колӧ репетируйтчыны кӧть нин ӧти жыр. А сценаыд выступайтӧм вылад век сюрас, — тӧдчӧдісны «Зарни сьылансаяс».