БӦРЪЯ ТУЙӦ КОЛЛЬӦДІГӦН

Кувсис матысса морт. Кыдзи сійӧс нуны кырлавны? Транспорт абу, сьӧм эз жӧ лӧсяв. Кыдзкӧ-мыйкӧ, шуам, сельсӧвет пыр позис лэччӧдны шойсӧ юрсиктса моргӧ, но сэні оз на примитны, либӧ примитасны да лун 3–4 тшӧктӧны виччысьны. Кырлалысьыс ӧти, а кулысьыс уна. Сэтчӧ жӧ моргыс некытчӧ шогмытӧм: дзескыд, шоныд, шойясыс пыранінас джоджас туплясьӧны.

Кулӧмдінын выль морг стрӧитӧм йылысь сёрнитӧны во 10 нин, но доддьыс оз вӧрзьы. Писькӧс йӧз ассьыныс кувсьӧмаяссӧ лэччӧдӧны Кӧрткерӧсӧ, Сыктывкарӧ, а коді оз вермы, кырлавтӧг и дзебӧны. Бӧрыннас котралӧны быд сикас документысла, ӧд натӧг мортыс век на лыддьыссьӧ вот мынтысьӧн, бӧрйысьысьӧн...

Неважӧн районса администрацияын вӧлі медициналӧн тӧжд-мог кузя «гӧгрӧс пызан». Но сэні морг йылысь юалӧмыс мыйлакӧ эз и кыптыв. А кӧть и кыптывліс кӧ? Сёрниыд сёрниӧн и кольӧ. Йӧзыс оз нин эскыны быдсяма кӧсйысьӧмыслы. Со коми войтырлӧн районса конференция вылын кывкӧртӧдас сюйисны жӧ выль морг вӧчӧм йылысь вӧзйӧм. Во джын коли, но некутшӧм вежсьӧм абу.