ВИДЗ-МУ ВӦЛӦГАСӦ — АССЬЫНЫМ

Важӧн нин мунӧ сёрни юрсиктын видз-му овмӧсса вӧлӧгаӧн торъя вузасянін восьтӧм йылысь. Мед йӧзыс эз котравны лавкасянь лавкаӧ, а вермисны ӧтилаысь ньӧбны йӧв, яй, картупель да град выв пуктас. Но водзмӧстчысьыс оз сюр.

Ӧні 80 прӧчент йӧв да йӧлысь вӧчӧм прӧдукциясӧ районӧ вайӧны Сыктывкарысь да Кировысь, яй (медсясӧ чипанлысь да полуфабрикатъяс) бокысь жӧ вайӧны 99,2 прӧчентсӧ. Сӧмын 0,8 прӧчент яйсӧ, кодӧс вӧчӧны районын, иналӧны тані — детсадъясӧ, школаясӧ, шӧр больничаӧ, социальнӧй учреждениеясӧ.

Сэтшӧм ылі сиктъясысь, кыдзи Воч, йӧлыс вузӧс вылӧ дзик оз мун, лэччӧдлӧны Зимстанӧ да юрсиктӧ сӧмын яй.

Талун районын кык видз-му ов мӧс — Помӧсдінын да Пожӧгын, кӧні вӧчӧны йӧв-яй. Бырисны совхозъяс Немдінын, Кулӧмдінын, Керчомъяын. Ручын вӧдитӧны сӧмын картупель. Став надеяыс ас овмӧсъяс вылӧ, кодъяс и иналӧны йӧвсӧ МТС-лы. Но сійӧ босьтӧ вывті донтӧмысь да сдайтысьыс воысь-во чинӧ. Оз ёна ышӧд и субсидия — кабалаяс чукӧртӧм вылас мунӧ уна кад. Лӧсьӧдісны кӧ йӧв-яйӧн торъя вузасянін, ас овмӧсъяс эськӧ окотапырысь вайисны прӧдукциясӧ сэтчӧ. Дерт, колана справкаяс босьтӧмӧн.