АТТЬӦ, ЙӦЗЫС ОЗ ЭЛЯСЬНЫ

Августын Тымсерын заводитасны вӧчны выль больнича. Стӧчджыка кӧ, дзоньтавны-лӧсьӧдны сы улӧ важ столӧвӧйлысь керка. Важыс зэв нин омӧльтчис, ӧд 50 вося нин.

Уджалысьяс асьныс, кыдз вермӧны, дӧмлӧны. Больничаӧн веськӧдлысь Александр Валентинович Долгих кӧкъямыс лун тільсис-мырсис пусян жыръяс да перевязочнӧяс, эжис джоджсӧ линолеумӧн. Медсестраяс асьныс жӧ белитчисны. Сьӧмыс ремонт вылас райбольничасянь, кыдзи пыр, эз вичмы, 1.000 шайтӧн сетісны «Тимшерлес» да «Тимшерторг», 500 шайт чуктӧдіс ас вылас уджалысь В. Сысоев. Водзті тані куйлісны 30–40 мортӧдз, ӧні сӧмын 10 койка, 4-ыс войся, 6-ыс — лунся.

— Эз кӧ отсасьны предпринимательяс, кыдзи и олім, — шуӧ больничаӧн веськӧдлысь, — ӧд миян участокӧ тшӧтш пырӧны Лопъювад, Мыс. Ӧні со, шуам, пес ваялісны, арнас шог оз ло. Аттьӧ Андрей Михайлович Паршуковлы, чурканас гузьгис ӧшинь улӧдз.

Врач-терапевтлӧн кывъяс серти, коллективыс больничаын зэв бур. Быдӧн тӧдӧ ассьыс могсӧ, ӧдйӧ сетӧ йӧзлы отсӧгсӧ. А. В. Долгих бур боксянь пасйис врач-терапевт Эдуард Дмитриевич Чувьюровӧс, фельдшер Ирина Александровна Паршуковаӧс, акушерка Ирина Алексеевна Андрееваӧс, медсестраяс Надежда Петровна Сулемаӧс, Татьяна Кирилловна Цветковскаяӧс, фельдшер-лаборант Марина Владимировна Паршуковаӧс. Эм нӧшта пинь бурдӧдан кабинет, сэні зільӧ Александр Васильевич Игнатов.

Сідзсӧ, препаратъясӧн, лекарствоясӧн ӧні сьӧкыдлуныс абу, босьтӧны Филатовскӧй аптекаысь. Шприцъяс, капельницаяс судзӧдӧны сэтысь жӧ. Лёк, мый абу холодильник. Вайисны татчӧс аптекаӧ да Лопъюӧ 3 выль кӧзӧд, лекарствоыс оз нин тшык, но колӧ холодильникыс и больничалы.

— Миян сьӧкыдлуныс сэтшӧм жӧ, кутшӧм и районса мукӧд бурдӧдчанінын. Но тупкысьны ог мӧвпалӧй, ӧд видзӧдластӧг колясны кык посёлокса да Мыс сиктса висьысьяс, — висьталӧ врач А. В. Долгих. — Найӧс, кыдз вермам, бурдӧдам.

Аттьӧ, йӧзыс оз элясьны, зэв шаньӧсь найӧ тані.