ВЕСЬКАВЛӦМАӦСЬ ВЬЕТНАМӦ

Кытчӧ сӧмын оз вайӧдлы армейскӧй службаыд миян зонъясӧс. Кодкӧ вӧлӧма Эфиопияын, кодкӧ Иранын, Сирияын. А Кулӧмдінысь Дмитрий Касев да Анатолий Потапов веськавлӧмаӧсь Вьетнамӧ.

Дима велӧдчӧма Троицкӧй авиационно-техническӧй училищеын, кор сійӧс босьтӧмаӧсь армияӧ. Кӧсйӧма лоны лётчикӧн, а веськалӧма морфлотӧ. Владивостокын велӧдчыштӧм бӧрын том зонмӧс индӧмаӧсь судно вылӧ, коді корсялӧма минаяс. Тайӧ буксир вылас сійӧ ветлӧдлӧма матӧ куим во. Матроссянь воӧдчӧма боцманӧдз. А Вьетнамӧ налысь командасӧ мӧдӧдлӧмаӧсь Персидскӧй кӧджын лоӧмторъяс дырйи. Судноыс, позьӧ шуны, весалӧма туйсӧ мукӧд боевӧй корабльлы, вешталӧма-идралӧма фарватерысь минаяс. Сэкся походын, коді нюжалӧма 14 сутки, экипажлы ковмӧма вуджны морякъяслы бура тӧдса «Эльма» тайфун пыр. Ок и летыштісны пӧ буксирнымӧс гыясыс, казьтывлӧ Дмитрий, судноыс 21 метр кузьта, а бовъялӧ шызьӧм-гызьӧм ва вылас кыш моз. 40 морта командаысь унаӧс жӧ пӧ и вукӧдіс сідз шусяна саридзса висьӧм.

Сувтӧма налӧн корабльыс Камрань кар дорӧ. Сэні и нуӧдӧма боевӧй дежурствосӧ. А Анатолий Потапов тайӧ жӧ кар дорас волӧма ваувса пыжӧн. Сэтчӧ веськавтӧдз сідзжӧ велӧдчӧма Владивостокын. Ёна жӧ пӧ и котрӧдлісны-дасьтісны. Весиг сюйлӧмаӧсь барокамераӧ — мед тӧдмавны, кыдзи кутчысьӧ мортыс джуджыд ва пытшкас. А саридз пыдӧсас пӧ мукӧддырйиыс ковмыліс овны лун дас витъясӧдз. Камрань дорын кыпӧдчӧмаӧсь. Весиг лэдзлӧмаӧсь карас петавны. Вьетнамын олысьяс йылысь Анатолийлӧн кольӧма бур казьтылӧм. Век пӧ нюмъялӧны, дасьӧсь отсавны, кӧть и роч кывсӧ оз гӧгӧрвоны.

* * *

Тайӧ сӧмын кык морт, кодъяслӧн ылі муын, стӧчджыка кӧ, ылі ваясын, служба йылысь ми вермим висьтавны. А кымын татшӧмыс Коми му пасьта. Найӧ оз радейтны ошйысьны-висьтасьны асланыс вуджӧм туйяс йылысь. Гашкӧ, кывкутана службаыс велӧдіс? Сійӧ жӧ Дмитрий Касевыс бӧрыннас вель дыр уджаліс милицияын, лоис майорӧн, ветліс война вылӧ Чечняӧ, а Вьетнамын служитӧм йывсьыс ӧдва и висьтасис.