ЛӦНЯ ВИСЬТАСИС АНЬ...
Ӧнія том йӧз пиысь гежӧд, кӧнкӧ, тӧдӧ, мый сэтшӧмыс «Нати», «Газген». Водзті миян сиктъясса видз-му вылын тайӧ тракторъяснас и муркӧдчылісны. Колхоз котыртан воясӧ, война дырйи да и сы бӧрын найӧ и бергӧдісны кызвын уджсӧ. И веськӧдлісны наӧн медсясӧ нывбабаяс.
Мыйта том аньӧс мӧдӧдлісны колхозъяссяньыд трактористъяслӧн курсъяс вылӧ. Мужикулов воюйтіс, и на пыдди сиктса став тӧжд-нокыс ӧшйис нывбабаяслӧн да челядьлӧн пельпомъяс вылӧ.
Лебежнӧйысь Вера Андреевна Мишарина вӧлі трактористкаӧн. Но война бӧрас нин. Батьсӧ, нэмӧвӧйся кузнеч Прокӧ Ӧндрей Булышевӧс, 1941 воын босьтісны фронт вылӧ. Вералы сэки вӧлі 7 арӧс. Вот пӧ и ковмис мырсьыштны мамӧлы ыджыд семьянад, казьтывлӧ ӧні олӧма ань. Кӧть эськӧ челядьыс быдторйӧн жӧ зілисны отсасьны. Петам пӧ гӧрны да мам сӧлас вӧв вылӧ, а ми вокъяскӧд гӧрйӧ кутчысям. Мед кокниджык вӧлі, чой горувсӧ ветлӧдлам.
Воӧма Мария Власьевна Булышевалӧн кӧзяиныс ёна ранитчӧмӧн, ныр пырыс пуля мунӧма. Первойсӧ вермыштӧма на, сэсся абу кутӧма. Пывсьыны ки вылын 3 во новлӧдлӧмаӧсь. Кувсьӧма да, шогысла да дойысла сэсся парализуйтӧма и Вералысь мамсӧ.
Ставыс тайӧ муніс том нывлӧн сьӧлӧм пыр. И сэк жӧ коліс асывсянь сёр рытӧдз уджавны колхозын, нажӧвитны трудодень. Сэки Лебежнӧйын вӧліны «Вын» да «Труд» колхозъяс.
Курсъяс вылӧ ветлӧм бӧрын ныв 3 во веськӧдліс «Газгенӧн», а сэсся пуксьӧдісны ДТ–54 вылӧ. Плугарнас вӧлӧма Прокӧ Анна Лёня, зэв рам да уджач зон. Мыйтакӧ му пӧ и бергӧдім сыкӧд, бара казьтывлӧ Вера Андреевна. Кывтыдӧ и катыдӧ ыстывлӧмаӧсь гӧрны-пуктысьны, Ёль сайӧ тшӧтш и. Кӧдзлӧмаӧсь сю и анькытш, вӧдитлӧмаӧсь уна картупель, град выв пуктас. Тайӧ ӧні рассялісны-эндісны матігӧгӧрса муяс, а сэки татшӧм идӧртӧмлуныд эз вӧв, быдӧн висис ӧтувъя овмӧс вӧсна. Вералы во мысти нин сетісны похвальнӧй грамота, быд собранньӧ вылын медводз казьтыштлісны нимсӧ.
Ӧтлаын уджавлысьяссӧ сиктса ногӧн висьталіс — Рӧман Анна, Ӧндрей Иван, Ӧнько. А бригадир-механикнас вӧлӧма Александр Беллон — Немдін вожын зэв тӧдса морт, кодӧс репрессируйтлӧмаӧсь.
Семья лӧсьӧдӧм бӧрын трактор вылысь, дерт, ковмис чеччыны. Вит челядьӧс ӧд воддза верӧсыскӧд вочасӧн чужтісны. А вӧлӧма мужикыс шахтёрӧн, орчча районын чужлӧма.
Мунісны овны Усть-Нем-Базаӧ, ӧнія Югыдъягӧ, кӧні ань 20 во чӧж сэсся завхозаліс больничаын.
Кыдзкӧ лӧня, нэмчӧжся уджнас ошйысьтӧг ни сьӧкыд олӧм вылас элясьтӧг висьтасис вӧвлӧм трактористка, уджвывса ветеран. Пырмунігмоз казьтыштіс на, мӧд верӧсӧй пӧ кувсис жӧ нин 4 во сайын, кӧть эськӧ 15 во на красуйтчи сы дорын. Тыдалӧ, челядь да внук-внучкаяс вӧсна тӧжднас кокньӧдӧ ловсӧ, бурмӧдӧ сьӧлӧмсӧ. Сэсся и ыджыд ас овмӧсын бергалӧмыс — а видзӧ на мӧскӧс да кӧзаясӧс — оз сет лигышмунны. Медся ичӧт Вика нылыслӧн нин ӧд кагаыс 15 арӧса, 9-ӧд класс помалӧ Немдінса школаын. Анюта, кӧнкӧ, юасьлӧ жӧ ыджыд мамыслысь сылӧн олӧм-вылӧм, колхозын уджалӧм йылысь. И, кӧнкӧ, тӧдмаліс нин, мый сэтшӧм «Натиыс» да «Газгеныс».
