ЭМ КОД ВЫЛӦ ЛАЧА КУТНЫ

Тырис 100 лун Кулӧмдін районса юралысьлӧн уджӧ С. П. Каплинлӧн босьтчӧмсянь.

Тайӧ креслӧ вылас Сергей Петрович абу выль морт, ӧти пӧрйӧ веськӧдліс нин Эжва йылын олӧм-вылӧмӧн. И зэв эз кажитчы веськӧдлысьлы, кор вӧзйим дасьтыны газетӧ гижӧд буретш 100 лун тыригкежлас. Мыйла пӧ ловъя йӧз кузя пасъявны 9, 40, 100 лунъяс. Ме пӧ локті ас районӧ дыр кежлӧ и эн виччысьӧй ӧдйӧ бӧр мунӧм. Кыдзи кужа, кута зільны Кулӧмдін районӧс сӧвмӧдны-кыпӧдны и менӧ некод оз торк. Ӧти-кӧ, лӧсьӧді уджалӧм могысь бур команда, мӧдкӧ, тӧда мыйсянь босьтчыны.

А босьтчӧмыс эм нин. Ачыс вӧрса специалист, С. П. Каплин гӧгӧрвоӧ, мый районлӧн аскиа луныс — вӧр овмӧс сӧвмӧдӧм сайын. Кыдзи уджаласны «Монди Бизнес Пейпа СЛПК» улӧ пырысь талунъя предприятиеяс, кутшӧм туйвизь мӧдасны кутны аски вӧр заптан котыръяс, сы сайын и районлӧн бюджет. Вӧр заптӧмыс ӧні экономикалӧн медтӧдчана юкӧн на, но, гашкӧ, коркӧ вӧрзяс, сувтас кок йылас видз-му овмӧс, сылӧн позянлуныс абу жӧ этша, мыйта угоддьӧ эндӧ, а йӧзыс кӧсйӧны видзны скӧт, вузавны йӧв-яй, та помысь нажӧвитчыны. Коркӧ лӧсялас и мупытшса озырлунъяс босьтӧм — наӧн Эжва йыв зэв озыр, но оз вӧдитчы.

Кулӧмдін район нэмсӧ нимавліс аслас енбиа йӧзӧн. Вӧчасьысьяс, серпасасьысьяс, гижысьяс, киподтуя мукӧд войтыр сетӧны аски кежлӧ лача, мый Коми мулӧн тайӧ аслыспӧлӧс юкӧныс, (кыв оз бергӧдчы шуны пельӧснас) кутас на шыавны. Эм код вылӧ кутны лача. С. П. Каплин босьтчис вӧжжиас кужӧмӧн да крепыда. Сӧмын колӧ аслыным сылы отсавны, мый вылӧ туйдас.