ВОАС МЕД АС ГАЗЕТ

Гожӧмнас йӧзыс ёнасӧ оз тэрмасьны судзӧдны ассьыныс радейтана лыддянторъяссӧ, тыдалӧ, кадыс абу ветлыны пошта вылӧ. Но ӧд гижӧдны вермасны и поштальонъяс.

Тымсерын поштасӧ разӧдӧны кыкӧн — Ольга Васильевна Паршукова да Наталья Витальевна Самохина. Олӧма йӧзӧс гижӧдны найӧ волӧны гортӧдзныс. Кыдзи висьталӧ татчӧс пошта юкӧнӧн веськӧдлысь Любовь Егоровна Попова, посёлоксаяс медъёна судзӧдӧны «Трибуна» газет, а сэсся «Красное знамя», «Парма гор». «Коми му» воӧ этшаджык, но судзӧдысьясыс важӧн нин сійӧс лыддьӧны, оз шыбласьны мукӧд петас вылӧ. Шуам, Евдокия Андреевна Булышева, Николай Флегонтович да Алексей Васильевич Шаховъяс, Галина Григорьевна Линдт республикаса медтӧдчана коми газет вылӧ сёрмӧдчытӧг гижӧдчӧны быд во, и ньӧти оз каитчыны. Ӧд кытысь сэсся коминас лыддян став республика пасьтаысь юӧръяссӧ. Тымсерсаяс унаӧн юасьӧны и «Коми мулысь» «Тысяча мелочей» содтӧд петассӧ.