АНГЛИЯ ГРӦЗИТЧӦ ВОЙНАӦН

Каспийскӧй море сайын эм государство — Афганистан. Сыкӧд орччӧн ӧтарсяньыс Сӧветскӧй Россия, мӧдарсяньыс — Индия (Англия улын). Афганистана-Англияа костын мунӧ спор во сё кымын нин. Англия кӧсйӧ босьтны Афганистансӧ аслас кипод улӧ. 1840ʼ воын англичана вермылісны нин босьтны. Мӧд вонас (1841) афганистанса йӧз бӧр босьтісны. Арнас 1842ʼ воын англичана бара вермисны Афганистантӧ, жугӧдісны столичасӧ — Кабул кар. 1879ʼ воын англичана тшӧктісны Афганистанлы некутшӧм государствокӧд (Англия кындзи) не тӧдмасьны. Сентябр тӧлысьын 1879 воӧ афганистанса йӧз бара кыпӧдчисны Англия вылӧ, босьтісны ассьыныс столичанысӧ (Кабул). Декабрын бӧр англичана найӧс вермисны. 1880ʼ воын Англия бара шуис — некодкӧд, торъя нин Россиякӧд, не тӧдмасьны.

Неважӧн Афганистан гранича дорын вӧлі виӧмаӧсь кымынкӧ англичанаӧс. Англия зэв ёна скӧрмис дай шуис: он кӧ пӧ пӧкӧритчы бурӧн — война пӧ лэпта; сэки жӧ Англия тшӧктіс орӧдчыны Россияысь, мед миянкӧд Афганистанлӧн эз вӧв некутшӧм удж нуӧдӧм. Тадзи шуис Керзон (кывлісны нин та йылысь унаӧн). Эськӧ Англиялы со мый колӧ. Афганистансянь 1000 верст сайын (Кавказын) эм нерп (нефть, мыйысь вӧчӧны карасин), сійӧ зэв ёна колӧ англичаналы. Налӧн думыс сэтшӧм: вермыны Афганистанӧс да кыдзкӧ судзӧдчывны сэсся миян нерп дорӧ... Ок, оз ло сідзи! Ӧні Англияын власьтыс вуджны кутіс рабочӧйяс ки улӧ. Найӧ оз лэдзны Керзонлы важ моз горшасьны, вӧтлӧны важ правительствосӧ, Керзонӧс тшӧтш; зэв эськӧ абу окота озыръяслы мунны да, лоӧ!

Бӧръя телеграммаяс юӧр вайисны: английскӧй войска пӧ чукӧртчӧ Афганистан дорӧ.

Война кӧ сэні лыбас — аддзасны уджалысь йӧз, коді паніс сійӧс, мый вӧсна сійӧ лои.