МАМЪЯСӦС, ЧЕЛЯДЬЯСӦС КОЛӦ ЁНА ДӦЗЬӦРИТНЫ

Сьӧкыд олӧм.

Миян сиктъясын нывбабалӧн кодь сьӧкыд олӧм некодлӧн абу. Медся нин сьӧкыд да пемыд олӧм челядя аньяслӧн, быдтысьысьяслӧн. Коми ныв мунӧ верӧс сайӧ томӧн, челядь вежӧрнас, оз весиг удит смӧжайтныыс, ёнмыныыс нывнас. Весиг оз думышт водзвыв верӧс саяс сьӧкыд олӧмсӧ. Медводдза лунсяньыс жӧ эськӧ сэсся казялӧ лэчкӧ шедӧмсӧ да. Удж, сьӧкыд уж, асывсянь рытӧдз оз бырлы керка-карта гӧгӧрын, видз-му вылын, вӧрын. Сэсся быд во челядясьӧм мӧдӧдчас. Воысь воӧ сьӧктӧ олӧмыс. Шойччӧг сылы оз овлы: лун — видз-му вылын, керка-карта гӧгӧрын, вой — кага потан дінын. Сы вӧсна со и челядь быдтӧмыс миян оз удж туйӧ мун, оз пыдди пуктысь. «Челядьыд нӧ пӧ мый, уджъясыд пӧ на дорысь коланторъясджык». Челядь, коньӧръяс, дӧзьӧр ни видзӧм быдмӧны асьныс.

Дӧзьӧртӧг челядь кулалӧны.

Посни челядьтӧ, кагаястӧ ёна колӧ дӧзьӧритны! Кагатӧ 6 тӧлысьӧдз колӧ куш мам йӧв вылын видзны, весиг оз ков мукӧдторйӧн вердны. Колӧ зэв сӧстӧм кӧлуйӧн видзны, асьсӧ мыськавны быд лун, мед некор оз пет кага дінысь шомыс дук.

Миян кага дӧзьӧритӧм весиг абу. Ставсӧ вӧчам бӧрӧн, буретш кыдз оз ков. Гожӧмын, уджъяс дырйи мамъяс оз эштыны кага дінын овны, лунтыр кежлӧ кольӧны найӧс ичӧтик видзысьлы либӧ пӧрысьлы. Кагаыд лунтыр ва вылын, няйт вылын куйлас. Бӧрдӧмысь вомас сюйыштасны нюш, нянь акльӧдлӧмӧн дӧра пиӧ кӧрталӧмаӧсь да. Дерт, сэсся мытыд да быдсяма висьӧмыд босьтӧ. Арталӧмаӧсь да — сиктъясын пӧ ар тыртӧдз быд 100 кага пытшкысь 70 кулӧ. Ловйӧн кольысьясыс оз жӧ зэв красуйтчыны, быдмӧны омӧликӧсь, висьлӧсӧсь. Чужтылас эськӧ коми ань уна челядьӧс, да этшаӧс быдтынысӧ вермас. Унджык кагаыс костті кулаласны.

Мамъяс, сьӧкыд олӧмысла, весиг оз жалитны кагаяснысӧ, шуасны: «Ен пӧ эськӧ аддзис, мича сылӧн сэн местаыс». Бур олӧм помысь эськӧ мамыд сідз оз жӧ шу да.

Быдтысьӧм йылысь водзӧ кутам газетӧ гижны.