ШОНЫДЫС — НЁЛЬ ПАЧСЯНЬ

Тымсерса котельнӧй, коді пырӧ Кулӧмдінса «Тепловодоканаллӧн» борд улӧ, шонтӧ посёлоксьыс детсад, больнича, аптека, клуб, лавкаяс. Кызвын стрӧйбаыс важ. Мастерскӧй участокса да овмӧдчӧминлӧн администрацияса уджалысьяс ӧні ветлӧдлӧны керкаысь керкаӧ, видзӧдӧны-донъялӧны, кыдзи сэні лӧсьӧдчӧны тӧв кежлӧ, индалӧны, мый колӧ вӧчны, мед «пышйис» этшаджык шоныд.

Тыр ӧдӧн дзоньтасьӧны котельнӧйын. Кык котёл вияліс да налысь пытшкӧссӧ вежисны, коли мавтыштны нёльнан пачсӧ. Зэлӧдалісны да зэвталісны насосъяс.

Кыдзи висьталӧ участокса мастер Александра Григорьевна Губер, шоныд сетанінын кызвыннас дзоньтасисны асланыс уджалысьяс, мыйсюрӧӧн отсавны — ӧшинь вӧчны, ва башня видзӧдлыны сӧмын корлісны Югыдъягысь рабочӧйясӧс. А уджалысьясыс тані — ставныс нывбабаяс, кӧкъямысысь кыкыс пенсия вылынӧсь нин, мукӧдыс зільӧны 20 да унджык во нин. Пачьяссӧ ломтӧны пескӧн. Ломтасыс вӧр посёлокад эм. Ас вылас уджалысьяс вайӧны зэв бур пес. Корсюрӧ дорйылӧны и тьӧс-плакаӧн — брускӧн, пӧвйӧн. Пес запасыс ӧні нин куйлӧ гырысь чукӧръясын. Кизьӧр ломтасыс эм жӧ. Дизельлы соляркасӧ сетӧны «Тимшерлес» ООО да асшӧр уджалысьяс. Дерт, вештысьӧмӧн. Солярка-бензиныс колӧ би кусласигӧн да пес пилитны. Ӧні, шуӧ мастер, дизельнад, майбыр. Би кӧ пӧ кусӧдасны, асьным сійӧс сетам. Водзті ёна майшасьлісны, войбыдъясӧн котралісны, мед трубаяс оз кынмавны.

«Тепловодоканаллӧн» Немдінса юкӧнын татшӧм котельнӧйыс нӧшта Югыдъягын, Белоборскын, Смолянкаын, Немдінын. Кӧнсюрӧ ломтысьӧны из шомӧн, мукӧдлаас пескӧн. Быдлаын тыр ӧдӧн дасьтысьӧны тӧв кежлӧ.