«ПОЖӦМА ЯГЫН» ШОЙЧЧӦНЫ ЭЖВА ЙЫВСА ТОМ СПОРТСМЕНЪЯС
Кыдзи котыртӧма Эжва йылын том спортсменъяслысь шойччӧм, висьталӧ «Кулӧмдін» муниципальнӧй районса администрацияысь физкультура да спорт юкӧнӧн веськӧдлысь Иван Егорович Тарабукин.
— Шойччӧдны том спортсменъясӧс, дерт, колӧ, ӧд найӧ тӧвбыд ордйысисны, песісны вын-эбӧссӧ. Но найӧ асьныс сідзи шуисны, шойччыны пӧ кутам... уджалӧмӧн. Выль сезон йылысь нин мӧвпалӧны да дасьтысьӧны сы кежлӧ ӧнісянь.
Кольӧм воын моз — Кольӧм жӧ, кӧнкӧ, котыртанныд гожся спортивнӧй лагерь?
— «Пожӧма яг» турбазаын спортсменъясӧс шойччӧдам кык сменаӧн. Первойыс, 21 лунся, помасьӧ нин. Сэтчӧ чукӧртлім лызьӧн котралысьясӧс, волейболӧн, баскетболӧн ворсысьясӧс. Мӧд котырыс, воддза моз жӧ 50 морта, воас турбазаӧ августын. Сэні лоӧны лызьӧн котралысьяс, туристъяс, ворсан спортӧ нырччысьяс.
— Кыдзи коллялӧ кадсӧ томулов?
— Зэв кыпыда. Ветлӧны походъясӧ, котыртлӧны быдсяма гажсӧ и, дерт жӧ, тренируйтчӧны. Вердӧны найӧс нёльысь лун, сьӧмсӧ сетӧ соцстрахлӧн районса юкӧн. Ворсӧм-вермасьӧм вылӧ ставыс жӧ эм: теннис пызанъяс, мачасян площадкаяс, тренируйтчан кӧлуй-эмбур. Лагерлысь уджсӧ нуӧдӧны водзвыв лӧсьӧдӧм план серти, веськӧдлӧ сменанас писькӧс да сюсь морт, ачыс спортсменка — Екатерина Ивановна Мишарина. Сылы отсасьӧны ДЮКФП-лӧн филиалысь тренеръяс: Немдінысь Василий Иванович Игнатов, Кулӧмдінысь Татьяна Ивановна Мишарина да Александр Васильевич Нестеров, Зимстанысь Светлана Дмитриевна Матящук.
ДЮКФП-лӧн мӧд котыр, сӧмын лызьӧн котралысьяс, кык пельӧ юксьӧмӧн июльын да августын мӧдасны чӧжны вын «Олимп» лагерын, Сыктывкарса стадион вылын. Сэтчӧ мӧдӧдам вынаджык лыжникъясӧс, могмӧдам лыжероллеръясӧн, олӧм-шойччӧм вылӧ сьӧмсӧ бара жӧ торйӧдас соцстрах.
— Гожӧм — туристъяслӧн сезон. Быд во районса ветлысь-мунысьяс гежмалӧны нималана ордымъяс: Кадам, Канава, Эжва йыв, Джеджим парма. Таво мый выльсӧ вӧзъянныд?
— Таво медводдзаысь июль 20 лунсянь восьтам «Том спасатель» лагерь. 50 морт кутасны овны палаткаясын Ичӧт Аныбын. Сэні эм фермер овмӧс, сёян-юанысь тӧжд оз ло. А тренируйтчыны местаыс зэв кивыв: джуджыд кыръяс, визув-кӧдзыд ю, сьӧкыд трӧпаяса вӧр. Сэсся и асьныс лагерсаяс дасьтасны сідз шусяна турполоса, тренажёръяс — лоӧ кӧні сӧвмӧдны вын-эбӧстӧ. Пасъя, кольӧм во районса туристъяслӧн команда республикаса «Безопасносьт школа» ордйысьӧмын босьтіс 2-ӧд места. Таво кӧсйӧны лоны медводдзаясӧн.
Сезон кежлӧ ставсӧ урчитӧма котыртлыны районын, Войвыв кытшбердса Уралын да весиг Кавказын 20 поход. Команда, коді мунас Кавказса гӧраясӧ, вештысяс сӧмын туйсьыс. Сёйӧмсьыс мынтысяс район, а овны кутасны палаткаясын. Кольӧм во миян туристъяслӧн котыр сэтчӧ ветліс нин. Ёна воӧма сьӧлӧм выланыс походыс.
— Физическӧй дасьлун кузя челядьлӧн да том йӧзлӧн клуб ассьыс филиалъяссӧ уджӧдӧ 14 сиктын да посёлокын. Тайӧ том спортсменъяслӧн быдса армия. Казьтыштӧй кӧть гоз-мӧд ним, кодъяс «дзирдыштісны» бӧръя кадас.
— Ставнысӧ кӧ лыддьӧдла, газет лист бокад оз тӧрны. Но пасъя Помӧсдінысь Ольга Игнатоваӧс, районын лызьӧн медбур котралысьясысь ӧтиӧс. Спортын вермӧмъясысь кольӧм воын районса юралысь сетіс сылы стипендия. Таво стипендияыс вичмис Пожӧгысь Иван Третьяковлы, сідзжӧ лызьӧн бура котралысьлы, да Скӧрӧдумысь Алексей Чисталевлы, коді пызанвывса теннис кузя республикаса ордйысьӧмын лоис чемпионӧн. Пыр зэв бура вермасьӧны ас коддьӧмыскӧд Озъягса баскетболистъяс. Таво сэтысь нывъяслӧн команда вермис баскетбол кузя республикаса ордйысьӧмын.
— Вермӧмтӧ колӧ мудзӧн-пӧсьӧн шедӧдны. И тренеръяслысь кывзыны-велӧдчыны. Пасйӧй медбур тренеръяссӧ.
— ДЮКФП-ын тренерыс 18, и кӧть ставнысӧ ошкы. Век жӧ торйӧда Озъягысь ворсан спорт кузя тренер Ханверди Гаджимурадович Исрафиловӧс, Дереваннӧйысь туризм кузя наставник Мария Андреевна Нестероваӧс, спорт клубса директор Елена Дмитриевна Кузнецоваӧс. Ставныс найӧ сьӧлӧмсӧ сетӧны челядькӧд уджлы, ёна зільӧны, мед Эжва йылын водзӧ сӧвмис спорт.
— Спорттӧ сӧмын кӧсйӧмнад да ӧткӧн зільӧмнад он сӧвмӧд...
— Да, уджыс тайӧ ӧтувъя — школалӧн, бать-мамлӧн, спорт юкӧнын зільысьяслӧн, районса власьтъяслӧн. Быд во кӧ вӧлі районса юралысьлӧн тавося кодь гӧгӧрвоӧмыс, спортлы подувсӧ позис ёна ёнмӧдны. Сӧмын «Пожӧма ягын» спортлагерь лӧсьӧдӧм вылӧ С. П. Каплин сетіс 500 сюрс шайт. Кутам лача, мый тӧв кежлӧ дасьтысьӧм могысь райбюджетысь сьӧмыс чуктас и филиалъяслы. Колӧ сетны позянлун спортсменъяслы, медым гожӧмбыдӧн чӧжӧм вынсӧ да сямсӧ найӧ пуктісны сӧмын гырысь вермӧмъяс шедӧдӧм вылӧ.
