КУЖӦМӦН КӦ КОТЫРТАН

Июнь сӧмын на помасис, да вӧр овмӧсса предприятиеяслӧн во джынся уджлы стӧч кывкӧртӧдъясыс абуӧсь на. Но тӧлысьнад ёна гырысь вежсьӧмъяс эз лоны.

Кулӧмдін районын январсянь майӧдз зэв бура уджаліс «Эжва» ООО-лӧн юкӧн. Вӧр заптан да кыскан плансӧ тыртіс пӧшти ӧти да джын пӧв, а чинталансӧ — 162 прӧчент вылӧ. И делӧвӧй вӧрсӧ лэдзис матӧ план да джын мында. Тыдалӧ, тӧдчис предприятиеӧн веськӧдлысьяслӧн, специалистъяслӧн сям-киподтуйыс. Тайӧ филиалнас ӧні юрнуӧдӧ республикаса вӧр овмӧсын нималана мор т — С. В. Пальшин. Водзті сійӧ вӧлі «Эжва» ООО-ас генеральнӧй директорӧн. Сылӧн зільӧмӧн бӧръя кадас вуж выйӧныс вежсис уджыс и йӧзыслӧн удж дорӧ матыстчӧмыс.

Тӧдчымӧн жӧ вевтыртіс и заптысян, и кыскасян, и чинтасян план «Комилесбизнес» ООО. Вермӧмыс бара жӧ веськӧдлысьяслӧн сям да писькӧслун сайын. А. С. Игнатов ловзьӧдіс Пузла посёлок, сетіс удж став матігӧгӧр сикт-посёлокын да весиг орчча районын олысьяслы. Сылӧн предприятиеыс Эжва йылын медбуръясысь ӧти. Во джынся тшупӧд дорӧ зумыда жӧ воисны «Мобильный лес», «Леском», «Локчимлесторг», «Боровской ЛПК» котыръяс. Став тайӧ предприятиеыс тшӧтш жӧ вевтыртісны тьӧс-плака вӧчан ассьыныс плансӧ.

Но босьтны кӧ СЛПК-лысь став предприятиесӧ, медся тӧдчана лыдпас — делӧвӧй вӧр вӧчӧм кузя вит тӧлысся плансӧ лои тыртӧма сӧмын 88 прӧчент вылӧ.