ГӦРБЫЛЬ — ӦШИНЬ УЛӦДЗ

«Йӧй» рынок кадӧ, кор предприятиеяс волісны киссян выйӧдз, район пасьта уджаліс лыда пилорама. Нинӧм нин шуны, кутшӧм сьӧкыд вӧлі стрӧитчысьяслы, ӧд воліс сэтчӧдз, мый ӧткымын сикт-посёлокын кувсьӧм мортлы гортсӧ вӧчны пӧвйыс оз вӧлі сюр.

Ӧні Эжва йылын дзик мӧд серпас. Артавсьӧ 60 сайӧ пилитчанін. Весиг сэтшӧм ичӧтик посёлокын, кыдзи Ярашъю, пилорамаыс кык. Дзик на неважӧн станок сувтӧдісны Парчын. Восьталӧны цехъяссӧ кыдзи асшӧр уджалысьяс, сідз и предприятиеяс. Быдлаын кутісны гӧгӧрвоны, мый гӧгрӧс вӧр иналӧм дорысь дась прӧдукциясӧ вузавны позьӧ ёна ыджыдджык выгӧдаӧн. Майбыр, станокъяссӧ судзӧдны ӧні абу сьӧкыд: позьӧ босьтны ссуда, а позьӧ и бӧрыннас вештысьны тьӧс-плаканас. Артмӧ кык бур: йӧзлы содтӧд уджаланін, а такӧд тшӧтш и нажӧтка.

Медуна йӧзӧс могмӧдісны «Белый В. В. ИП», «Комилесбизнес», «Локчимлесторг», «Оптима-Лес», «Гросс», «Пера» ООО-яс. Ӧткымынлаын пилитчанінъясас зільӧ 60 мортӧдз. Ставыс жӧ ичӧт предприятиеас 300-ысь унджык уджалысь. Гӧгӧрвоана, кызвын продукцияыс мунӧ районысь бокӧ, весиг суйӧр сайӧ, но йӧзлы коланаыс кольӧ жӧ. Ӧні сьӧмыд кӧ эм, сюрӧ ставыс, мый колӧ. Горт дорӧдзыд ваясны да гузьгасны, сӧмын вештысь. А «Белком» фирма Кулӧмдінса олысьяслы гӧрбыльсӧ ваяліс дзик дон босьттӧг. Весиг машинасьыс эз ков мынтысьны. Тырӧма нин база йӧрыс вӧр коляснас да.