ГОЖСЯ ПӦСКӦТИНА

Понъясӧс да кӧзаясӧс видзӧмын кӧ Кулӧмдінын пӧрадокыс сідзи эз и ло, гырысь скӧтсӧ гожӧмнас дӧзьӧритӧны тӧлкӧн нин. Ас овмӧсъяс сёрнитчисны мӧс-куксӧ видзны ӧчередьӧн. Тадзи кывтыдын и катыдын. Шуам, ӧти лун йирсьӧдчанінын пастукалӧ ӧти кӧзяин, мӧд лунӧ — мӧд нин. Видзӧдӧны ставнас стада бӧрсяыс.

Быд асыв шӧрсиктсянь катыдпомса му вылӧ вӧтлӧны сюрукъяссӧ, мед сэсся лунтыр кежлӧ кольны пастукъяслӧн дӧзьӧр улӧ. Пемӧсъяссӧ йирсьӧдӧны кӧкъямыссянь нёль час рытӧдз. Воас йӧртӧдӧ мунан кад, да сюрукъяс лабутнӧя ӧтув руньгӧны сиктса уличӧд гортӧдзыс.

Катыдын тшӧкыда пастукалӧ Лодыгинъяслӧн семья. Василий пиыс уджтӧмалӧ да весь бовъялӧм дорысь тані век нин делӧ бердын. А Матрёна Пудовна йӧзыдлысь скӧттӧ видзӧ витӧд во нин. Пыр отсасьӧ верӧсыс Николай Егорьевич. Кор ӧвада да жар и стадаыс зільӧ разӧдчыны, паныдавлыны волӧны и внучкаясыс. Тані, дерт, мӧскыс кывтыдын дорысь этшаджык, 33 юр, но куим пастуклы ӧвада дырйиыд абу жӧ кокни.

— Йирсясны час дасӧдз да гортланьыс нин видзӧдӧны довгыны, — висьталӧ Матрёна Пудовна.

Ачыс сійӧ дыр уджаліс вӧвлӧм совхозын, тӧдӧ, кыдзи матыстчыны пемӧсъяс дорад. Гашкӧ, та вӧсна и корӧны сійӧс пастукавнытӧ. Кӧть пӧ быд лун пӧскӧтина вылад пет. Торйӧн нин сэк, кор скӧт видзысьяс турун пуктӧны.

— Кольӧм во ме отсаси вит овмӧслы, таво босьтчи кыклы на, — водзӧ висьталӧ сюрукъясӧс дӧзьӧритысь ань. — Дерт, унджыклысь кӧ видзан, унджык и нажӧвитан. Ӧти лунсьыс овмӧсъяс мынтӧны 300 шайт.

Таво Кулӧмдінса пӧскӧтина вылын мӧсъяс баксӧны июнь 25 лунсянь. И сёр арӧдз на найӧс ковмас йирсьӧдны. Сідзкӧ, пастукалӧмӧн нажӧвитчыштны позяс на.