КУЛӦМДІНСА МАЭСТРО
«Шыладыд — тайӧ шыяслӧн лад». Кӧть эськӧ и ӧні «Эжваса дзоридзьяс» народнӧй хор лоӧ Комиын культураса уна рӧмӧн дзоридзалысь котырӧн, но вӧлі кад, кор Кулӧмдінса самодеятельнӧй артистъяс шензьӧдлісны ставнас республикасӧ.
Асшӧр композитор Василий Гущинлӧн зільӧмӧн Эжва йылын котыртчис сэтшӧм аслыспӧлӧс творческӧй коллектив, кодлӧн концертъясыс век чукӧртлісны зал тыр йӧзӧс. Василий Яковлевич кужис аддзыны да ӧтувтны ас гӧгӧрыс збыльысь ыджыд енбиа артистъясӧс, музыкантъясӧс, гижысьясӧс. Репертуарын став сьыланкывйыс — сӧмын ас авторъяслӧн. Шыладыс — дзик жӧ ас.
Хорӧн юрнуӧдысьлы веськыд киӧн вӧлі Михаил Карманов, культура юкӧнын зільысь. Сылӧн вежӧр да кияс пыр муніс концерталан став номерыс. Кыдзи музыкант-профессионал, Михаил Витальевич вӧчис сьыланкывъяслы аранжировка, шыльӧдіс, кыткӧ кӧ абу артмӧма авторыслӧн. И гижӧдыс збыльысь ловзьыліс, юргис да вӧрзьӧдіс йӧзлысь сьӧлӧмъяссӧ. И ачыс на тшӧтш ворсіс концертъяс дырйиыс. Быдсяма инструментнас: гобойӧн, саксофонӧн, кларнетӧн, пӧлянӧн, да, дерт жӧ, гитараӧн. Енмыс тай сетлӧма сямсӧ. Нотаяссӧ велӧдлӧма искусствояс училищеӧ пыртӧдзыс на.
Паджгаын и Визиндорын, Абъячойын и Лӧзымын, Сыктывкарын и Ухтаын — быдлаын, кыдз шуласны, вӧлі аншлаг. «Эжваса дзоридзьяс» хор ветліс Сочиӧ, Пензаӧ, Кировӧ и весиг суйӧр сайӧ — Финляндияӧ. Ачым аддзывлі, кыдзи Кудымкарын шензьӧдісны сэтчӧс видзӧдысьяссӧ. Коми-пермякъяс первойсӧ эз гӧгӧрвоны, мыйсяма ворсантор петкӧдісны сцена вылӧ гӧсьтъяс: быттьӧкӧ пес плака, а сэтшӧм шыяс сетӧ. Ош брунган тайӧ вӧлі. И сигудӧклӧн на дзольгис мыла горыс. А петкӧдліс коми йӧзлӧн нэмӧвӧйся ворсанторъяслысь позянлунъяссӧ Михаил Карманов. «Койтӧ тар», «Вӧрын ветлӧ ош» да мукӧд татшӧм йӧзкостсаӧн нин лоӧм сьыланкыв юргис сыӧн лӧсьӧдӧм партитура серти жӧ.
Коркӧ ӧти сёрниын Михаил висьтасис:
— Зэв стӧча коми йӧзыд нимтылӧмаӧсь музыкатӧ — шылад, сідзкӧ — шыяслӧн лад. Гижигад и ворсігад тайӧс и колӧ кутны тӧд вылын: зільны, мед ливкйӧдлан ладыс эз торксьы, мед вӧлі гармония.
Найӧ, кодъяс ӧтлаын уджавлісны Михаил Кармановкӧд, кодъяслы сійӧ отсаліс петны ыджыд сцена вылӧ, ас костаныс мортсӧ нимӧдӧны маэстроӧн. Оз шмонитӧмӧн, а пыдди пуктӧмӧн. Шуам, Александр Бондаренко, районын зэв жӧ тӧдса музыкант, сідзи и шуӧ, татшӧм мастерыс пӧ Эжва йылын сэсся абу. Сэтшӧм жӧ мӧвпаӧсь, чайта, районса нималана композиторъяс, куим Василей — Гущин, Чувьюров, Лодыгин. Кымын концерт да гаж, и Кулӧмдінса «Василейтӧ» тшӧтш пуктісны ӧтув. Тӧдӧны творческӧй ёртыслысь киподтуйсӧ и Александр Уляшев да Александр Чувьюров. Ӧтиыс гижӧ сьыланкывъяс Скӧрӧдумын, мӧдыс нуӧдӧ «Лад» передача Коми телевидениеын. Буретш накӧд Михаил котыртліс ӧні на юргысь «Юрган» ансамбль. 1985 воын тайӧ котырыс республикаса ВИА-яс пӧвстын босьтіс первой места, а сэсся и шедӧдіс народнӧй ним. Бӧрынджык «Юрган» нимсӧ асаліс вокальнӧй музыкалӧн республикаса фестиваль.
Енбиа мортыд пӧ коркӧ кыпавлӧ ловнас, а коркӧ и усьлӧ. Но усьӧмыс мукӧддырйи сылы отсалӧ выныштчыны да сувтны нӧшта на вылысджык тшупӧд вылӧ. Ӧні М. Карманов культура юкӧнлы, тыдалӧ, оз ков — уджтӧмалӧ. А ӧд быдса дас во сійӧ веськӧдліс тайӧ отделнас. Отсыштны эськӧ енбиа мортыслы бӧр сувтны кок йылас, да сэтшӧм нин тай ӧнія олӧмыс: коді вылынджык пукалӧ, пуклӧс улас нальӧ вылӧджык кыпӧдчыны вермысьсӧ.
Век жӧ Михаил лачасӧ оз вошты, кӧсйӧ котыртны 4–5 морта сьылан-ворсан группа. Татшӧм сяма джаз-котыр ӧтчыд вӧлі нин культура керка бердын, ёна нимавліс. Ворсысь-сьылысьясыс пӧ выль ансамбляс эмӧсь жӧ нин. Сідзкӧ, коми сьылан радейтысьяслӧн лоӧ на позянлун выльысь кывзыны Кулӧмдінса маэстроӧс.
