СЭНІ, КЫТЧӦ СЬӦКЫД ВОӦДЧЫНЫ
Кулӧмдінса олысьяс юрсӧ чатӧртӧмӧн видзӧдӧны енэжсянь «гылалысь» парашютъяс вылӧ. Ӧти бӧрся мӧд воссьӧны куполъяс, мичаа лайкъялӧмӧн лэччӧны юрсиктсайса аэропорт площадка вылӧ. Тайӧ тренируйтчӧны вӧр видзан авиабазаса уджалысьяс. Водзын налӧн пӧсь кад, и колӧ лоны сы кежлӧ дасьӧн.
Кулӧмдінса авиаотделениелӧн видзӧдлас улын — 3 миллион 390 сюрс гектар вӧр. Татчӧ тшӧтш пырӧ и Кӧрткерӧс районлӧн ӧткымын квартал. Владимир карысь воӧм Ан–2 самолёт гожӧмбыд дежуритӧ татчӧс аэродром вылын. Шондіа, мича кос лунъясӧ сылы лоӧ кытшлавны сынӧдын 3–4 часӧдз, мед син сайӧ эз коль ни ӧти тшынтор. Казяласны кӧ ӧзйӧм, пыр жӧ юӧртӧны матысса лесхозӧ, отделениеса да базаса диспетчеръяслы. Сэні, кытчӧ сьӧкыд да дыр воӧдчыны кусӧдчысьяслы, уджӧ босьтчӧны «лэбалысь» пӧжарнӧйяс.
— Миян эм став коланаыс, мед сувтӧдны бисӧ, — висьталӧ авиаотделениеса начальник Г. Е. Иванов, — кусӧдчан кӧлуй, бур мотопомпаяс, торъя паськӧм, бур связь, сёян запас. Водзті вӧлі сетӧны весиг взрывчатка. Но медбур кусӧдчыны, дерт, зырйӧн. А медся тӧдчанаыс пӧжар дырйиыд — десантникъяслӧн да парашютистъяслӧн дасьлун, повтӧмлун.
Ӧні отделениеын 14 парашютист да 5 десантник. Ставныс асланыс уджын мастеръяс. Веськӧдлысь торйӧн нин ошкӧ дырджык зільысьясӧс — инструктор Юрий Фёдорович Виноградовӧс, десантник Александр Анатольевич Лодыгинӧс, лётчик-наблюдатель Георгий Борисович Чисталёвӧс, парашютист Николай Александрович Малышевӧс, заправитчысь Иван Григорьевич Фрединаӧс. Бӧръя кыкыс, позьӧ шуны, артмӧдӧны династия нин. Николай Малышевлӧн батьыс нэмсӧ жӧ уджаліс отделениеын, а Иван Фрединалӧн пиыс ӧні — «лэбалысь» пӧжарнӧй. Дерт, колӧ накӧд тшӧтш казьтыштны и диспетчер Антонина Егоровна Васыликӧс. Сійӧ пульт сайын 20-ысь унджык во нин, быд пӧжар кусӧдӧмын сылӧн зэв ыджыд пай.
Дерт, самолётнад лэбалӧмыд дона сувтӧ, ӧти часыс 17 сюрс шайт. Но вӧрыд донаджык. Ӧд сійӧ — национальнӧй озырлун. Кольӧм во торйӧн нин ёна сотчисны Усть-Немскӧй лесхозлӧн кварталъяс. Медсясӧ вотчысьяс понда — кодкӧ шыбитӧ кусӧдтӧм чигарка, кодкӧ кольӧ ӧгыра бипур. А ялаа ягад биыд кыдзи оз кутчысь? Лесничествояс эськӧ и ёна кусӧдчисны, налы отсасисны и вӧрын ас выланыс уджалысьяс да заптысьысь предприятиеяс. И век жӧ ылыссаджык ӧзйӧминъясӧ медводз волісны десантник-парашютистъяс. Мукӧд воас, кор ёна сотчӧ вӧрыс Россияын, миянлысь кусӧдчысьясӧс чукӧстлӧны весиг мукӧд обласьтӧ. Сідз, унаысь нин ветлісны Сибырӧ. Таво, Енмыс видзис да, май джынйӧдз ни ӧти пӧжар на миян вӧръясын эз вӧв. Та пыдди Россияын, шуам, Хакассияын, ёна пӧ сотчӧны. Но сезоныс сӧмын на заводитчӧ. Дӧзьӧртӧг та ыджда угоддьӧтӧ оз позь кольны, ковмас видзны медводз ассьыным вӧръяс. Та могысь и лӧсьӧдчӧны-тренируйтчӧны ӧні авиаотделениесаяс. Налы, кӧть и эз веськавлыны пӧжар вылӧ, тӧлысьнас быть колӧ чеччыштны парашютӧн кыкысь.
