ПЕТ ВАЙ, ПЕТ, АС ГАЗЕТ
Почтальон кӧ тіян пошта кудйӧ чӧвтас дон босьттӧг кутшӧмкӧ выль газет либӧ листовка, тайӧ оз нин чуймӧд. Тадзи ёна дурӧны бӧрйысьӧмъяс дырйи. Но и сідз то сэні, то тані лыддьӧм вылӧ вӧзйӧны зэв на и аслыспӧлӧс петасъяс. Кулӧмдінын, «Парма горысь» ӧтдор, ӧнӧдз лэдзисны ас газетъяс школаын велӧдчысьяс да том йӧзлӧн котырӧ пырысьяс. Пожӧгын «Ёль» газет думыштісны челядь, велӧдчысьяс да бать-мам. И со юрсиктын бара выль лыддянтор — петіс сиктса овмӧдчӧминлӧн «Кулӧмдін» нима газетлӧн медводдза номер.
Киров обласьтын печатайтісны 999 экземпляр — буретш та мында позьӧ лэдзны некӧні регистрируйтчытӧг. Редколлегия, кытчӧ пырисны водзмӧстчысь депутатъяс, администрацияын уджалысьяс, вӧвлӧм журналистъяс, шуис ассьыс петассӧ йӧзӧдны кварталнас ӧтчыд. Кутас кӧ артмыны, мӧдасны тшӧкыдджыка. Газетса юралысь редактор И. Т. Морохинлӧн кывъяс серти, выль изданиелӧн медшӧр могыс — бурджыка петкӧдлыны йӧзлы администрациялысь став сикас уджсӧ. Дерт, и лӧсьӧдны топыд йитӧд сиктса войтыркӧд, мед найӧ тшӧтш и асьныс чуйдасны, мый йылысь гижны. Ӧд могыс уна — колӧ водзӧ мичмӧдны-пелькӧдны юрсикт — районлысь чужӧмбансӧ, уджавны семьяяскӧд, бурас туйдны-велӧдны томуловӧс, тӧдмӧдны Кулӧмдінлӧн озыр историяӧн да с.в.
«Кулӧмдінлысь» медводдза номерсӧ сиӧма Ыджыд Вермӧмлы. Тані и вӧвлӧм фронтӧвик йылысь пасйӧдъяс, и тылын зільысь ань йылысь гижӧд, эм и война йылысь юалӧмъяса викторина. Овмӧдчӧминлӧн сӧвет ӧти сайын шыӧдчис лыддьысьысь дорӧ, медым тӧдмавны, мый мӧвпалӧны войтырыс йӧзӧдлытӧм войнаяс вылын усьӧмаясӧс казьтылан пас лӧсьӧдӧм кузя.
Нёль ичӧтик лист бокад, дерт, уна гижӧд оз тӧр, но газет вӧчысьяс сяммӧмаӧсь йӧзӧдны тшӧтш и сиктлӧн ӧнія олӧм-вылӧм да важся история йылысь пасйӧдъяс да весиг пуктысигкежлӧ бур сӧветъяс.
Став сертиыс, Эжва йывса юрсиктлӧн администрация аслас уджӧ тайӧ выльторсӧ пыртӧмӧн «ылӧдз кӧсйӧ лыйны да унатор кыйны». Сылӧн водзмӧстчӧмыс ыззьӧдіс нин лӧсьӧдны ас газет и мукӧд сиктса депутатъясӧс.
«Кулӧмдінлысь» первой номерсӧ нимӧдігӧн, ӧнія ногӧн кӧ, презентация дырйи сиктса юралысь Иван Попов кывкӧрталіс:
— Культурно-просветительскӧй, агитационнӧй уджын тайӧ, дерт, тӧдчана тшупӧд. Но водзын виччысьӧ и мӧд на — сиктса музей восьтӧм. Эска: миян водзмӧстчысь йӧзлӧн зільӧмӧн ставыс артмас.
