МЕД ЭТШАДЖЫК ВӦЛІ НЕМИНУЧАЫС
Енмыс, гашкӧ, видзис, либӧ тӧдчис уджыс ГИМС-лӧн — ичӧт суднояс кузя инспекциялӧн, но таво май 1 лунӧдз Кулӧмдін районын вӧйис сӧмын ӧти морт. А кольӧм во тулыснас пӧдіс 11, воддза воын — 14 морт.
Кыдзи висьталӧ ГИМС участокӧн веськӧдлысь старшӧй госинспектор И. Б. Попов, налӧн 4 морта котырыс и збыльысь вӧчис ыджыд удж. Во заводитчигӧн учёт вылын вӧлі нин 1.204 пыж — ичӧт и ыджыд, пелыса и мотора да весиг резинаысь. Январсянь жӧ регистрируйтӧма 120 пыж — вося планысь унджык нин, судноӧн вӧдитчысь 110 мортӧс аттестуйтӧма. Сӧмын апрельын пасйисны 66 пыж. Инспекторъяс асьныс ветлӧдлісны сикт-посёлокъясӧ, волісны Лебежнӧйӧ, Парчӧ, Немдінӧ, Югыдъягӧ, Помӧсдінӧ. Бӧръя сиктас документъяссӧ босьтісны торйӧн нин унаӧн, буракӧ, тӧдчис вӧралысьяслӧн котырӧн юрнуӧдысь М. В. Курочкинлӧн ышӧдӧм-кесйӧдлӧмыс. А ставыс участокӧ во заводитчӧмсянь воліс 422 морт.
— Миян могъясыс ГИБДД-лӧн кодьӧсь жӧ, сӧмын пӧрадоксӧ колӧ кутны ва вылын, — тӧдчӧдӧ ичӧт суднояс кузя инспекцияӧн веськӧдлысь Иван Попов. — Пыжыд — сэтшӧм жӧ транспорт, и колӧ, медым вӧдитчисны сыӧн закон серти, эз торкавны ветлан правилӧяс, эз веськавны неминучаясӧ.
Рейдъяс дырйи инспекторъяс оз сӧмын видлавны документъяс, но и сёрнитӧны йӧзыскӧд, кыдзи видзчысьны ва вылын ускӧттьӧысь, ӧлӧдӧны либӧ мыждӧны, мортыс кӧ дзугӧ правилӧяссӧ. Шуам, мотора пыжӧн веськӧдлысьлӧн кӧ абу та вылӧ удостоверениеыс, таысь штрапыс 1.000 шайт да унджык. Пыжын кӧ код юра, сылысь правосӧ пыр жӧ мырддьӧны.
Ва вылын пӧрадок бӧрся видзӧднысӧ ГИМС-са уджалысьяс петавлӧны милицияса, охотнадзорса, рыбнадзорса сотрудникъяскӧд ӧтлаын. Отсасьӧны и общественнӧй инспекторъяс А. Б. Коротков, А. П. Дёмин, А. Н. Уляшев, М. В. Шахов, А. Е. Печеницын.
А отсасьысьясыс колӧны, та ыджда районыдлы 4 инспекторыд этша, быдлаӧ он удит. Со кольӧм воын Керчомъяын Пыжа гаж дырйи муртса эз пӧд ӧти морт. Бур, сэтчӧ веськаліс милицияса участкӧвӧй А. П. Катаев, коді и дорйис. Овлӧ, инспекторъяс кӧсйӧны вӧчны йӧзыслы бур, оз лэдзны найӧс петны ва вылӧ гажа юрӧн, а водзӧссӧ кылӧны пинялӧм да весиг грӧзитчӧм. Кольӧм во и таво нин татшӧмъясыс паныдасьлісны Керчомъя вожын.
Лун кӧть вой журъялӧны инспекторъяс асланыс участокӧд, коді нюжӧдчӧма Аныб вуджанінсянь дзик Эжва йылӧдз. Налысь «Меркурий–30» мотора «Мастер–110» пыжсӧ позьӧ казявлыны и Воч, и Нем, и Кӧтйӧм, и Пивъю вылысь. Шойччыны некор. Кыдзи и туй вылын, ва вылын колӧ жӧ зільны, мед этшаджык вӧлі неминучаыс, мед йӧзыс вочасӧн велалісны пӧрадокӧ.
