НЯНЬ КӦ ЛОВЗЯС, ШАНЯ ОВСЯС

Сыктывкарын 15 во нин уджалӧ «Эмбур+» вузасян котыр, коді могмӧдӧ йӧзсӧ сёян-юанӧн да быд лунъя коланаторъясӧн. Эмӧсь сылӧн лавкаяс и Эжва йылын, Помӧсдін вожын. Котырнас веськӧдлысьыс Д. А. Уляшев, ачыс Вӧльдінса, та вӧсна чужанінас да сы гӧгӧрса сикт-посёлокын и восьталіс вузасянінъяссӧ. Вӧльдінысь ӧтдор лавкаыс эм Скӧрӧдумын, Ягкӧджын, а Помӧсдінын весиг кык.

— Ме бура тӧда, ас йӧзлы мый колӧ, — висьталӧ Дмитрий Алексеевич, — та вӧсна зіля, мед вӧлӧга да мукӧд вузӧс кузя найӧ эз тӧдлыны некутшӧм майшӧг.

Тайӧ тӧждлунсьыс, гашкӧ, и бӧрйисны сійӧс землякъясыс райсӧветса депутатӧн.

Вӧльдінын да Ягкӧджын водзті вӧлі сьӧкыд няньӧн. Унаӧн пӧжасисны гортаныс. А ӧні тані воссис пекарня. Ас лавкаяссьыс ӧтдор кӧзяин мӧдӧдӧ няньсӧ и Ярашъюӧ да Пожӧгдінӧ.

Кӧть и абу ыджыд пӧжасяніныс, но эм став позянлун уджавны ӧнія кадся технология серти. Ваыс воӧ трубаӧд, пызьсӧ пожналӧны да няньшомсӧ гудралӧны оз жӧ ки помысь. Орслӧн пекарняысь вайӧм пач ломтысьӧ пескӧн, но сылысь жарлунсӧ позьӧ жӧ кутны колана выйын. А пӧжасьӧм бӧрся видзӧдӧ торъя специалист — Татьяна Вениаминовна Уляшева, профессия сертиыс кондитер-кулинар. Сійӧ и веськӧдлӧ нёль морта коллективнас.

«Эмбурса» кӧзяин Дмитрий Уляшев серти, Вӧльдінын пекарнясӧ стрӧитісны сы вӧсна, мый тасянь кивывджык разӧдны пӧжассӧ, быдлаӧ эм туй. Сӧмын Ягкӧджӧ колӧ вуджны Эжва вомӧн. Сэтчӧ водзті нулісны пызьсӧ, но кокниджык ӧд вуджӧдны дась няньсӧ.

Гожӧмнас, кор сиктса кӧзяйкаяс дугдӧны ломтыны пач, пекарняын луннас пӧжалӧны ӧнія серти кык пӧв унджык — 1.200 тупӧсьӧдз. Сэні уджалысьяс чайтӧны, мый мичаа банйӧм, пушыд тупӧсьяссӧ ньӧбысьыс таво нӧшта на содас. Йӧзлы чӧсмасьӧм могысь босьтчисны лэдзны и батон, регыд кутасны вӧзйыны булки.