МУЯСТӦ ОН ЭНДӦД
Ныр улын гӧра-кӧдза. Кыдзи сы кежлӧ дасьтысьӧны Эжва йылын? Висьталӧ Кулӧмдін районса видз-му овмӧс управлениеын уджалысь Александр Валентинович Костин:
— Ӧтувъя овмӧсъяслы ставсӧ таво колӧ гӧрны-кӧдзны да пуктыны 172 гектар, сы лыдын картупель 50 гектар, ӧти вося культураяс 100 да кӧйдыса быдмӧгъяс — 7 гектар. Тайӧ кольӧм воын серти этшаджык. Чинтысям угоддьӧяснас, унджыксӧ вӧдитны ог вермӧй да. Шуам, Ручын сӧмын 5 гектар картупель и кӧсйӧны пуктыны.
Сьӧкыдлуныс уна. Сідз, колӧ петкӧдны муяс вылӧ 11 сюрс 700 тонна куйӧд, а вермим сӧмын 7 сюрс 150 тонна на. Сетлісны во джын кежлӧ 870 сюрс шайт, мед кыскавны торф, но сьӧмсӧ видзны ог вермӧй, ломтасыс абу да. Овмӧсъясын кӧсйылісны ньӧбны 24 тонна минеральнӧй мувердас, медсясӧ картупель улӧ, но абу сьӧмыс. Век жӧ сёрнитчим 5-ӧд номера ПМК-кӧд, коді аслас сӧвтчан агрегатӧн да бульдозерӧн отсалас петкӧдны торфсӧ и Пожӧгын, и Помӧсдінын.
— Кыдзи кӧйдысъясӧн?
— Уна вося культураяслӧн запасыс эм на, но «Пожӧг» видз-му кооператив кӧсйӧ содтӧд ньӧбны 1 тонна, «Помӧсдін» — 1,7-ӧс, сідзжӧ колӧ вайны 2 тонна вика, 6-ӧс — зӧр, Помӧсдінӧ 8 тонна зӧр да 3 тонна вика. Кӧсйим ньӧбны Санкт-Петербургысь выль сорта картупель, но ветлынысӧ сьӧмыс абу. Миян районын медсясӧ паськалӧма
— Дась-ӧ техника?
— Кызвыннас дась. Гӧрны-кӧдзны ковмас 29 трактор, 6 грузӧвӧй машина — найӧ дасьӧсь. Кулӧмдінса МТС-лы коли выль пӧв чукӧртны сӧмын ӧти «Беларусь». Став культиваторсӧ, диска агассӧ, пуктысян агрегатсӧ дзоньталӧма-мавталӧма. Сӧмын колӧ помавны 5 гӧр да 2 кӧдзан машина. Дерт, техникаыс важ нин, овмӧсъяс бергӧдчӧны кыдзи вермӧны, запчасьтсӧ корсьӧны то ӧтилаысь, тӧ мӧдлаысь. А выльсӧ ньӧбны позянлун абу, лизингӧн кӧ, МТЗ–82 сулалӧ 614 сюрс шайт, ДТ–75 — миллион сайӧ. Кыдзкӧ тай «Помӧсдін» СПК ньӧбис жӧ кольӧм вося декабрын кык выль трактор. Запчасьтъяс вылӧ кӧть нин этшаник да сьӧм овмӧсъяс чукӧртӧны йӧзлы куйӧд вузавлӧмӧн. Кольӧм во «Помӧсдін» тадзи нажӧвитіс 60 сюрс сайӧ шайт. Таво Скӧрӧдумын да Помӧсдінын бара лӧсьӧдісны куйӧдсӧ буртъясӧ, мед инавны ас овмӧсъяслы.
— Медыджыд лачаыс, дерт, йӧз вылӧ. Кыдзи виччысьӧны гӧра-кӧдзасӧ механизаторъяс, рабочӧйяс, специалистъяс?
— Оз нимкодясьӧмӧн. Бур нажӧткаыд абу да. Корсюрӧ, вермӧны кӧ, овмӧсъясын вештысьыштӧны сьӧмӧн, корсюрӧ йӧлӧн-яйӧн. СПК-яслӧн быд лунъя став нажӧткаыс мунӧ электроэнергияысь вештысьӧм, мувердас, кӧйдыс, ломтас-мавтас ньӧбӧм вылӧ. Сэтчӧдз воим, мый запасын абу ни ӧти куб солярка.
— И век жӧ, муястӧ он эндӧд. Быд во татшӧм серпасыс да, петан туйсӧ овмӧсъясын, кӧнкӧ, корсьӧны жӧ?
— Апрель 20 лунӧ вӧлі районса юралысь дорын видз-му овмӧслӧн тӧждъяс да аскиа могъяс йылысь ыджыд сёрни. Чукӧртчылісны видз-му кооперативъясын, МТС-ын уджалысьяс, фермеръяс, висьталісны ассьыныс мӧвп и йӧв-яй вузалан донъяс содтӧм, и прӧдукция иналӧм, и техника судзӧдӧм, и ссуда да субсидия босьтӧм кузя.
Петан туйсӧ шуисны корсьны ӧтув, райадминистрацияса выль юралысь Сергей Петрович Каплинлӧн отсӧг вылӧ надеяӧн да видз-му кыпӧдан нацпроект вылӧ лачаӧн. А гӧра-кӧдзасӧ овмӧсъяс кӧсйысисны нуӧдны колана ногӧн. Артыштны кӧ, угоддьӧясыс ӧд абу и гырысьӧсь. Фермеръяс ассьыныс 16,5 гектарсӧ картупель улад кыдзкӧ-мыйкӧ бергӧдасны жӧ. А муяс вылӧ ставӧн шуисны петны май 12–15 лунъясӧ.
