ЖАЛЬ, «ТЫВНЫМ» РОЗЯ
Йи сылӧмсянь 20 лун Эжва да сы бердса тыяс вылын кыйсьыны дзик нинӧмӧн оз позь — йӧзӧдӧма тулысын кульмысь чериӧс видзан тӧлысь. Такӧд тшӧтш май 20 лунсянь июнь 20 лунӧдз оз позь кыйсьыны тыясын, кӧні кульмӧ ёді.
Юр выв тыр уджыс Россельхознадзорса чери видзан инспекцияяслӧн, кӧть эськӧ мог-нокыс оз быравлы во чӧж — помся прӧверка, рейд быд сикас предприятие-овмӧсас. Республикаысь районкостса 8 отделысь Сыктывкарса — медгырысь лыдын. Торйӧн нин кузь участокыс Кулӧмдінса юкӧнлӧн — Аныб вуджанінсянь дзик Эжва йылӧдзыс, Чер да Вӧрса Чер юяс босьтӧмӧн. Горулынджык эз на вӧрзьы йи, а сэтчӧс инспекторъяс ветлісны нин рейдӧн Пузласянь Ягкӧджӧдз, кутісны 5 браконьерӧс. Кольӧм вежонын бара катлісны Кулӧмдінсянь Эжва кузя, кытшовтісны воссьыны нин удитӧм тыяс.
— Командировкаӧ корсюрӧ нуӧдлам и «Комирыбводлӧн» районса юкӧнын да милициялӧн райотделын уджалысьясӧс, — пасйӧ рыбнадзорын зільысь В. И. Арестенко. — Видзӧдам, мед йӧзыс эз торкавны Коми Республикаын чери кыян, васа сідз шусяна биологическӧй ресурсъяс видзан правилӧяс. Сюрасны кӧ татшӧмъясыс, зілям гӧгӧрвоӧдны кодсюрӧӧс бура сёрнитӧмӧн, а кодсюрӧӧс и протокол отсӧгӧн. Унаӧн на тай ва вылӧ петӧны сӧмын ӧти кӧсйӧмӧн — горшавны-курыштны.
Валерий Ивановичлӧн кывъяс серти, кӧть и кыйсьысьясыс тӧдӧны, мый абу ичӧт штрапыс, медэтшаыс 1.000 шайт, ӧткымынӧн воштӧмаӧсь и полӧмсӧ, и яндзимсӧ. Ӧти мортыслы позьӧ вӧйтны кулӧмсӧ 50 метрӧдз, а вӧйталӧны муртса оз километрӧдз. 32 миллиметрысь ичӧтджык синма угоддьӧӧн вӧдитчыны оз жӧ позь, а чӧвталӧны чаль кузя ёслы. Тулыснас татшӧм серпас унджык ты вылас. Майбыр, лавкаысь позьӧ ньӧбны кулӧм-ботантӧ кутшӧмӧс кӧсъян, а мырддясны кӧ, абу жаль, ӧтчыд кыйсьӧмӧн вештыссьӧ.
— Районным ыджыд, быдлаӧ огӧ вевъялӧй, — содтӧ рыбнадзорысь жӧ главнӧй специалист Н. Е. Шахов. — Вӧлі кӧ позянлун, кантораӧ эг и волӧй эськӧ, но тшӧкыдасӧ ветлыны абу весиг бензиныс. Эм эськӧ 3 «Ямаха» мотор, да пыжыс ытва дырйиыд туйтӧм — резинаысь вӧчӧма. Сійӧн бадь пӧвстад он пыр. Да нӧшта спасжилеттӧгыд. Рейдӧ лоӧ босьтлыны ассьыным кӧрт пыж.
Россельхознадзор юкӧнса уджалысьяс завидьпырысь и дӧзмӧмсорӧн шуӧны, со пӧ «Комирыбвод» ассьыс специалистъяссӧ могмӧдӧ быд сикас кӧлуйнас и паськӧмнас, весиг носки да кепысь сетӧ, а миянлы ӧти пӧрйӧ ва вылӧ петавны вӧзйисны... ботинки. И командировочнӧй мынтӧны жаляддза. Сикт-посёлокӧ ветлыны куимнан службаыслы — рыбнадзорлы, охотнадзорлы да ветнадзорлы лоӧ ӧти важиник «УАЗ»-ӧн. И ас тшӧт весьтӧ.
Чери кыян сезон воссьытӧдз ылынкодь на. А вот браконьеръясӧс куталан кадыс важӧн нин заводитчис, да «тывйыс» тай уналаті розя.
