КОДІ МЕДБУРА ЛЫСЬТЫСЬӦ?
Сиктса овмӧсыд оз на киссьы, кор эмӧсь татшӧм зіль киподтуя, быдтор тӧдысь-кужысь уджалысьяс. Тайӧ кывкӧртӧдыс артмис машинаӧн лысьтысьысь операторъяслӧн конкурс дырйи, коді вӧлі кольӧм вежонӧ Помӧсдінын.
Районса дояркаяс татшӧм ордйысьӧм вылас чукӧртчылісны кызь коймӧдысь. Овмӧсъясса веськӧдлысьяслӧн, видз-му овмӧс управлениелӧн чӧжсис нин сям найӧс котыртӧмас. «Помӧсдін» СПК дасьтысьӧма зэв бура, сьӧмнас отсалісны видз-му овмӧс министерство да районса администрация. 200 пемӧслы кирпичысь вӧчӧм картаын вӧлі конкурс нуӧдӧм могысь став коланаыс, ӧти сайын позис тӧдмасьны сэні уджаланногӧн. А пажнайтісны гӧсьтъяс СПК-лӧн столӧвӧйын, кӧні вердӧны сӧмын ас вӧлӧгаӧн да татшӧмыс эз вӧв весиг совхоз дырйи.
Районысь бӧрйӧм 7 лысьтысьысь петкӧдліс ассьыс сямсӧ и тӧдӧмлунсӧ. Колӧ вӧлі вочавидзны аслыссяма тестын уна сикас юалӧм вылӧ, а сідзжӧ петкӧдлыны, кыдзи разьны да тэчны йӧв аппарат, кыдзи лӧсьӧдчыны да лысьтысьны. Дерт, санитарнӧй нормаяс тӧд вылын кутӧмӧн.
Вермис тайӧ конкурсас «Пожӧг» СПК-лӧн Пожӧгдін фермаысь Надежда Ивановна Третьякова. Мӧдӧн лоис «Помӧсдін» видз-му кооперативысь Бадьёльйывса скӧт картаысь Анна Егоровна Уляшева да коймӧдӧн — Пожӧгысь жӧ Татьяна Алексеевна Игнатова. Ставныс найӧ эз нин ӧтчыдысь ордйысьлыны тадзисӧ, томджыкъяслы вӧлі мыйӧ велӧдчыны налысь.
— Конкурсыс, ӧти-кӧ, ышӧдӧ кыпӧдны профессиональнӧй сямлун, мӧд-кӧ, пестӧ лача, мый сиктын скӧт видзӧмыс некор оз быр, лоӧны кӧ татшӧм водзмӧстчысь, тӧждысьысь, писькӧс аньяс, — пасйис районса видз-му овмӧс управлениеӧн веськӧдлысь Изосим Степанович Попов.
Сы серти кӧ, эз ылӧсас шуны ордйысьнысӧ Помӧсдінын. Буретш сэні лысьтӧны районса ӧтувъя овмӧсъяс пӧвстын медуна йӧв. И быдӧн вермис юасьны, видзӧдлыны, кыдзи тайӧс шедӧдӧны. А май помланьыс скӧт видзысьяслы сямнас юксьыны позяс Пожӧгдінын нин. Сэні став мӧссӧ тырсьӧдӧны искусственнӧя. Сэтчӧ и воласны выль аддзысьлӧм-конкурс вылӧ районса осеменаторъяс.
А медводдза места босьтысь Н. И. Третьякова кутас ордйысьны лысьтысьысь операторъяс пӧвстын республикаса тшупӧдын нин Сыктывкарын май 16 лунӧ.
