ТӦДЛІСНЫ СІЙӦС И МИЯН ТУРИСТЪЯС

Странаӧс шызьӧдісны сідз шусяна техногеннӧй неминучаяс. То шахтаын взрыв, то инвалидъяслӧн керкаын да театрын пӧжар. И миян Комиын со МИ–8 вертолёт усьӧма...

Бӧръя неминучаас пӧгибнитӧма квайт морт, на лыдын и «Югыд ва» национальнӧй паркса уджалысь. Ӧні, специалистъяслӧн кывкӧртавтӧдз, тайӧ лоӧмтор гӧгӧрыс бергалӧ быдсяма сёрни: кыдзи пӧ «Газавиалӧн» транспортӧ веськаліс бокӧвӧй морт, гашкӧ пӧ, весиг эз и предприятиелӧн могъясӧн лэбзьывлыны гӧраясас да.

Кулӧмдін районса ас му туялысьяс, туристъяс, кодъяс быд во ветлӧны Изйӧ, дерт жӧ, эз ӧтчыд паныдасьлыны тайӧ косньӧд тушаа, но винёв да сӧнӧд том мортыскӧд. Торйӧн нин гӧраясӧ туйыс кӧ муніс Вуктыл пыр. Кымын экспедиция колльӧдіс Виталий Хайруллин, туристъяслӧн кымын котыр висьталісны сылы аттьӧ ордымъяс вуджигӧн отсалӧмысь. Ачым уджавлі сыкӧд, эг ӧтчыд петавлы национальнӧй парклысь озырлунъяс видзан рейдӧ, узьлы вӧр керкаын и бипур дорын. Мортыс сьӧлӧмнас висис вӧр-ва вӧсна, зілис пестыны сы дорӧ муслун ставныслысь, коді вӧлі орччӧн. И тайӧ пӧрйӧ вӧр-валысь сӧстӧмлун туялан рейдас вӧзйысьӧма ачыс. Сэтшӧм нин сійӧ мортыс вӧлі — войнас кыпӧдан кӧть шойччан лунӧ — век дась мӧдӧдчыны туйӧ.

Кыдзи висьталіс паркса директор Татьяна Фомичева, инспекторлӧн вӧлӧма стӧч мог — видзӧдны, мед «Югыд валӧн» угоддьӧясын вӧлі тыр-бур пӧрадок. Уджсӧ вӧчӧм бӧрын котырыс вӧлӧм бӧр лэбӧ Вуктыл пыр Ухталань. Дурмӧм поводдя вӧсна, а коді вӧвлі гӧраясын, сійӧ тӧдӧ, кутшӧм сьӧкыд аддзыны шляча-зэр дырйи туйсӧ, вертолётсӧ кутӧма шыблавны ӧтарӧ-мӧдарӧ. Кӧнкӧ Ыджыд Паток да Тшугӧр костын машинаыс швачкысьӧма-усьӧма... Тайӧ местаясыс, дерт жӧ, тӧдсаӧсь миян туристъяслы, кодъяс тшӧкыда гежмалӧны Войвыв кытшбердса Изсӧ.

Виталий Ильдарович Хайруллинлӧн пӧгибнитӧмыс — ыджыд воштӧм абу сӧмын национальнӧй паркса уджалысьяслы, но и ставлы, кодлӧн уджыс йитчӧма туризмкӧд да вӧр-ва видзӧмкӧд.

Дзебны Виталийӧс нуисны чужанінас, Кировӧ.