БӦРЪЯ ВОСЬКОВ

Удж ни нажӧтка абу, семьяӧс вердны нинӧмӧн. Пинясьӧны гортын, «бич» вылӧ тамыша видзӧдӧны вӧвлӧм ёртъяс, суседъяс. Кытчӧ воштысьны? Дерт, мыйкӧ вузавны да кутчысьны стопкаӧ. Коддзан да кӧть ставсӧ вунӧдлан. А бӧрыннас сьӧлӧм вылад лоӧ нӧшта на лёк. Буретш татшӧм здукъясас кокни руа морт петӧ бӧръя воськов вылӧ.

Кольӧм тӧлысь помын Кулӧмдін районын ӧтпырйӧ куимӧн босьтчылӧмаӧсь помавны олӧмсӧ. Лыйсьӧмаӧсь пищальысь. Кыкыслы удайтчӧма збыльмӧдны думыштӧмторсӧ, коймӧдыс веськалӧма больничаӧ. Куимнан лоӧмторсьыс, висьталӧ РОВД-ысь лицензионно-разрешительнӧй тэчасса инспектор М. В. Шахов, мыжаыс курыдтор. Сы серти, йӧзлӧн киясын ӧні зэв уна регистрируйттӧм пищаль — пӧшти быд мӧд вӧралысьлӧн. Видзӧны дзебасын, вӧдитчӧны гусьӧн. Но, дерт, кадӧдз жӧ. Ружьеыд быть коркӧ лыяс. И вермас тшӧтш аслыд. Милиция зільӧ эрдӧдны закон дзугӧмӧн ружьеӧн вӧдитчысьясӧс, кыскӧ кывкутӧмӧ. Но шулӧны тай: мутиыд кӧ тойлӧ мортсӧ, йӧй воськовсьыс сійӧс нинӧм оз кут. Помкаыс абу гуся ружьеын, а мортыслӧн ӧбичаын, миян гудыр оласногын. Талун районын 13,2 сюрс верстьӧ мортысь уджалӧ сӧмын 10,5 сюрсыс. Тыр вир-яя 2.700 мужичӧй да нывбаба некытчӧ оз инасьны. Шогсӧ унджыкыс пальӧдӧны курыдторйӧн. «Троя» да мукӧд лёк сорас понда быд вежон пагалӧ некымын морт. Помалӧны олӧмсӧ ӧшӧдчӧмӧн, биын сотчӧмӧн, пищаль помысь. Воштӧмъясыс быттьӧ война дырйи...