ӦКМЫСӦД ЛУН
Ӧкмысӧд лун нин со, а пыр на оз эскыссьы, мый тэ абу. И некор он ло. Некор сэсся огӧ мунӧй муса Кадамад сьӧд ёкышъястӧ кыйны, некор огӧ пукыштӧй дзескыд кухняад сӧмын тэ ног заваритӧм тшай юигмоз да бӧръя гижӧд-снимокъястӧ видлалігмоз, некор огӧ тӧвзьӧй лешак ылнаӧдзыс командировкаӧ, кыдзи тай коркӧ ветлім Вӧлльӧ, Діасёръяӧ, Пузлаӧ... Оз эскыссьы ни меным, ни дона гӧтырыдлы, нылыдлы да пиыдлы, ни матысса ёртъясыдлы, мый оз нин ло сэсся кывлӧма гылыд шмоньтӧ, ӧттор-мӧдтор вылӧ ӧдйӧ шыбласьысь сёрнитӧ, сійӧ либӧ тайӧ лоӧмтор тӧдысь моз донъялӧмтӧ.
Куйлан тэ чужан Керчомъяса муад, кысянь петін Ыджыд олӧмӧ, мед лоны Ыджыд гижысьӧн. И Елизавету Филипповну Дуркину лоин. 44 арӧсӧдзыд гежӧдлы мойвилӧ шедӧдны татшӧм нимсӧ.
Зуркыд вӧлі туйыд, конъясьлін ачыд, и мукӧд конъявлісны. Но тэ пыр кужин кавшасьны-петны. Быд гурансьыс. И ёртъястӧ некор эн кольлы гуран пыдӧсас. Мыйта бур тэ вӧчин ас йӧзыдлы дженьыдик олӧмад! И тайӧ бур вӧчӧмыс мыйлакӧ тыдовтчис сӧмын ӧні, кор тэ эн ло. Тыдовтчис уна сюрс йӧзӧн пыдди пуктӧмын да тэнӧ колльӧдігӧн копыртчылӧмын, пыр казьтывны кӧсйысьӧмын. Гуасиг-кодрасигӧн отсӧга ки семьяыдлы да рӧдвужыдлы пыр жӧ мыччисны эз сӧмын уджвывсаясыд — «Коми му» газет да «Коми гор» радио редакцияяс, но и предприятиеяс да организацияяс, кодъяс йылысь тэ век восьсӧн гижин, зілисны босьтны дойсӧ йӧз, кодъяслы тэ коркӧ отсавлін аслад тӧдтӧг, бӧрдісны висьт-кывбуръястӧ радейтысьяс, кодъяс книгаястӧ видзӧны и велӧдчан сумкаясын, и Ен джаджйын.
Ӧкмысӧд лун. Сійӧ усьӧ декабрь 12-ӧд лун вылӧ. Ми, тэнад ёртъясыд, быть волам гу дорад, кисьтыштам курыдтор, нӧшта ӧтчыд копыртчывлам паметьыдлы. Юргас, кӧнкӧ, и кывбурыд, кодӧс тэ гижлӧмыд, гашкӧ, буретш татшӧм здук кежлӧ:
Бӧръя туйӧ колльӧдам ми ёртӧс,
Синва петмӧн жаль, кӧть том на мортыс.
Бӧръя кывъяс колльӧдчигӧн шуам,
Асывсяньыс крепыд аскур юам.
Ю кӧть эн, оз тӧдчы вина выныс,
Да и горшӧ сатшӧ табак тшыныс.
Кылӧ сӧмын виччысяна сёрни,
Вӧлі морт, а ӧні ставыс сёр нин.
Курыд шог, и дойсӧ венны колӧ,
Бӧръя туй...
Да помасьлытӧм олӧм.
Ставныс, коді тӧдліс Эдуард Алексеевич Тимушевӧс, енбиа коми поэтӧс, прозаикӧс, журналистӧс да прӧстӧ бур мортӧс, мед эськӧ тшӧтш казьтыштласны шоныд кывйӧн. Оз ков чайтны, мый сійӧ абу миянкӧд! Эдик аслас нюмсера, сӧдз видзӧдласнас, сьӧлӧмӧ пырны кужӧмнас, сӧстӧм коми кывъя прозанас да поэзиянас век лоӧ орччӧн.
