ШНИЧ «РОЧ»?

Висьталісны, миянкӧд тшӧтш пӧ уджалӧ Зимстан вожысь том морт. Менам земляк, сідзкӧ. Но, мися, лоӧ кодкӧд варовитыштны комиӧн. А, видзӧда да, сійӧ пыр рочасьӧ. Сёрни сертиыс эськӧ и тӧдчӧ: шнич коми, но ӧтдортчӧ чужан кывсьыс и ставыс. Тӧлысь-мӧд сайын на и школасӧ помалӧм бӧрын воӧма карӧ дзик коми посёлокысь, а со тай рочмӧма нин.

Ӧтчыд мужикулов ыстӧны вӧлі сійӧс лавкаӧ, а зонмыд пыксьӧ: «У меня вещи старые, не иду!» Вӧлӧмкӧ, уджалан паськӧма пӧ ме, кӧсйӧма шуны. А кынӧмыс сюммӧма да, юалӧ: «В рот засунуть ничо нету?» Коркӧ пані сёрни велосипед йылысь, мися, тормозыс оз кут да, колӧкӧ, тэ тӧдан, мыйла. Том мортыд мӧмъялыштіс да и шняпкис-шуис: «Цепь надо зэлӧдаланский».

Зіля эськӧ и гӧгӧрвоны сійӧс: парма пельӧсысь, гашкӧ, медводдзаысь на карӧ, рочьяс дорӧ веськалӧма, кӧсйӧ асьсӧ петкӧдлыштны. Но век жӧ абу лӧсьыд сьӧлӧм вылын. Янӧдӧ ӧд оз сӧмын асьсӧ, но и став коми войтырсӧ.

Менам чужан сиктын суседкаӧй — 99 арӧса немка. Сталин дырйи ыстылӧмаӧсь миян Войвылӧ. Шыӧдчан кӧ пӧрысь ань дорӧ рочӧн, пыр и пуктас места вылӧ: вочавидзас сӧстӧм коми кывйӧн. Йӧзкостса шмонь на казьтыштас. Оз тай, майбыр, ышнясь, мый вужъясыс Германияысь. И челядьыс (гырысь веськӧдлысьяс) сиктын кӧть карын сёрнитӧны землякъясыскӧд зэв вежавидзӧмӧн да комиӧн. Асьныс сідзи и шуӧны: коми нянь вылын пӧ быдмим да, нинӧмла тшапитчынысӧ.

Менам эмӧсь и тӧдса чувашка, роч, украинеч да весигтӧ грузин, кодъяс варовитӧны миян ног. Таысь найӧс ёнджыка на пыдди пуктӧны.

А мый кутасны шуны рочасьысь зон йывсьыс, кор локтас сійӧ Прупт бердын нэмсӧ олысь бать-мам дорас да мӧдас «зэлӧдаланскиясьны»?