ШОЙНА ВЫЛЫН

Крам праздникъясӧ карса шойна вылӧ матыссасӧ казьтыштны волӧны уна йӧз. Сёйӧны-юӧны налысь пай, а мый оз быр — яблӧк, кампет, печенньӧ, вина пыдӧс — кольӧны гуяс вылӧ. Муртса удитас лӧньыштны шойнаыс, крестъяс дорті вуджрасьӧны нин выльӧн локтӧмаяс. И здукӧн став гу вывсӧ «чышкыштӧны». Тайӧ налӧн — рушкунысӧ пӧткӧданторйыс.

Татшӧм ногӧн кынӧмпӧт перйысьясысь ӧтиккӧд сёрни пані. Вӧлӧмкӧ, шойнасӧ юклӧмаӧсь, быдӧнлӧн аслас «угоддьӧ». И «йӧз му» вылӧ пырны он лысьт. Кодлӧн «угоддьӧӧ» лӧсьӧдчӧны дзебны кулӧмасӧ, сійӧ и кодйӧ гусӧ. Таысь оз уна ни этша босьт — 2,5 сюрс шайт. Шогӧ вӧйӧм рӧдвуж оз артасьны. Тайӧ гу кодйысьясыс коммунхозын уджалысьяс дорысь тэрыбджыкӧсь.

Кодкӧ юалас, мый нӧ пӧ тані лёкыс? Сёян-юансӧ вайӧма кулӧмаясӧс казьтылӧм вылӧ, сідзкӧ, мед нуръясьӧны, коді кӧсйӧ. Сідз жӧ понъяс кыскаласны да ракаяс кокаласны-а. И гу кодйӧмысь сьӧм босьтӧмыд талун абу жӧ нин грек. Быд удж пӧ мынтысяна. Ӧти вежа ай тадз жӧ шуис меным.

Но сэтчӧдз нин али мый ми усим, мый терпенньӧысь петмӧн виччысям кодлыськӧ кулӧмсӧ, мед йӧз шог вылын пӧткӧдны кынӧм да тыртны зеп?