КОМИЫН ОЛАМ, КОМИСЬЫС ПОЛАМ?

Тӧданныд-ӧ, мый республикаын петӧ «Коми му» газет, коркӧ лыддьывлінныд-ӧ сійӧс? Татшӧм юалӧм вылӧ Вуктылса уличьясын мекӧд сёрнитысь дас мортысь сӧмын ӧти вочавидзис, кывлі пӧ, мый эм сэтшӧм газетыс, но ог судзӧд.

Юаси ме и небӧг лавкаын, и райгазет редакцияын, и газет-журнал вузавлан киоскын «Коми му» йывсьыд, но газетыс эз и сюр. Карса велӧдан управлениелӧн методическӧй юкӧнын абу жӧ, кыдзи и верстьӧлӧн да челядьлӧн библиотекаясын. Бӧръяясыс ыстысисны, мый республикалы тӧдчана тайӧ газетсӧ оз судзӧдны сьӧм тырмытӧм вӧсна. Да и лыддьысьыс пӧ абу. Челядьлӧн библиотекаын коми петасъясысь вӧліны сӧмын «Би кинь» журналлӧн апрельса да июньса номеръяс, найӧс пӧ редакциясяньыс мӧдӧдлісны. Эз вермыны тані ошйысьны и выльӧн петӧм коми небӧгъясӧн. Джаджйысь син улӧ усис сӧмын Елена Габовалӧн сборник да каталогысь сюрис ӧти аслам небӧг.

Дерт, лыддянтортӧ мырдӧн кӧвъявны он вермы, торйӧн нин карас кӧ кызвыныс роч да мукӧд кывъя йӧз. Но мыйлакӧ библиотекаясысь ни роноысь эз сюр тшӧтш и «Красное знамя». Поштаысь удайтчис ньӧбны «Республикалысь» куим лунсайся номер. Сэні шуисны, коді пӧ кӧсйӧ лыддьыны, судзӧдӧны гортаныс. А ӧд карад уна ветлысь-мунысь йӧз, тшӧтш и матігӧгӧрса сикт-посёлокысь да Россияысь вахтаӧн уджавны воӧмаяс. Налы, кӧнкӧ, абу жӧ веськодь выль юӧрыд, кыдзи да мыйӧн олӧ Коми му. Кыдзкӧ весиг забеднӧ, мый Коми муын петысь да республикалы тӧдчана прессалӧн коланлуныс войвывса карын чинӧ. Тадзтӧ, дерт, сэсся коми йӧзтӧ воӧмаясыд оз кутны пыдди пуктыны.