ЛЫМЪЯ МУСЮР ДОРЫН — АФРИКАЫСЬ ГӦСЬТЪЯС

«Югыд ва» национальнӧй паркын тшӧкыда позьӧ паныдасьлыны суйӧрсайса туристъяскӧд. Таво найӧ волісны Финляндияысь, Чехияысь, Польшаысь, Германияысь, Францияысь. А дзик на неважӧн Войвыв Ураллӧн мичлунӧн нимкодясисны Африкаса гӧсьтъяс. Тайӧ Танзанияса нацпаркъяс вылын попечитель г. Ахмед Мвилиму, Килиманджаро нацпаркӧн веськӧдлысь г. Ньямакумба Мафуру да Танзанияса посольствоын уджалысь Джордж Ленгежу.

Кӧть и ыркыд поводдяыс эзджык вӧв кивыв джунглиысь воӧмаяслы, но кынмӧмысь найӧс видзис татчӧс войтырлӧн пӧсь сьӧлӧм да лышкыдлун, мыйӧн Комиӧн олысьяс паныдалӧны быд гӧсьтӧс. Африканечьяслы воӧма сьӧлӧм выланыс, кыдзи тані видзӧны-дӧзьӧритӧны вӧр-васӧ, сэні олысьясӧс, а сідзжӧ мупытшса да мувывса озырлунсӧ. Кыдзи пӧ сӧмын слӧйманныд пыр кутны син уланыд 2 миллион гектарсӧ, кор паркас 60-ысь этшаджык уджалысь. Килиманджароса нацпарк ичӧтджык, но сэні пӧ зільӧ 160 морт. Быд сідз шусяна пост кутӧ йитӧд ӧта-мӧдыскӧд, штаб-квартиракӧд. Ветлӧм-мунӧм вӧсна оз жӧ ков майшасьны. Танзанияса законъяс сетӧны позянлун нацпаркъяслы (татшӧмыс ставыс 14) аслыныс нажӧвитчыны, найӧ бергӧдчӧны сӧмын ас тшӧт весьтӧ, туризм помысь. А «Югыд ваын» туристъяслысь уна сьӧмтӧ он пычкы. Колӧны на нӧшта бура дасьтӧм ордымъяс, ветлысь-мунысьяслы лӧсялана шойччанінъяс. Тані жӧ абу весиг позянлун лӧсьӧдны телефон пыр лючки йитӧд, ньӧбны колана транспорт. Суйӧрсаяс, кӧнкӧ, шензисны, кор аддзывлісны паркса уджалысьяслысь пыр кадся ветланторсӧ — пу пыж да важиник мотор. А мусюрса ичӧтджык юясӧд кылӧдчӧм могысь найӧ босьтлӧны пӧльтан пыж, сійӧн и петавлӧны дас да унджык лунся рейдъясӧ. Килиманджаро, Серенгет да Танзанияса мукӧд национальнӧй паркын миянын моз торкалӧны жӧ вӧр-ва видзан законъяссӧ, браконьеръяс лыдын чина йӧз и прӧстӧй вужвойтыр. Ӧтияс, шуам, вузалӧм могысь гусьӧн пӧрлӧдлӧны пуяс, нетшкӧны дона быдмӧгъяс вузалӧм вылӧ. Но сэні вывтіасьысьяссӧ мыждӧны чорыдджыка, оз миянын моз мынны сюрс шайта штрапӧн.

«Югыд ваын» вӧр-ва видзан уджӧ пырӧ сідзжӧ та кузя йӧзлы тӧдӧмлун сетӧм, экологическӧй лагерьяс котыртлӧм, детсад-школаын гӧгӧртас да сылӧн мичлун йылысь челядькӧд сёрнитӧм. Господин Мвилимбу пасйис, мый экопросвещение кузя найӧ кольччыштӧны. Сы серти кӧ, миянлы эм мыйӧ велӧдчыны ӧта-мӧдлысь, кӧть и олам Му шарлӧн ылі пельӧсъясын. «Югыд ва» нацпарк пырӧ «Природное наследие ЮНЕСКО»-ӧ. «Девственные леса Коми» сідз шусяна статуссӧ сылысь кӧнкӧ на моз жӧ тӧдчӧдасны и мирса мукӧд нацпаркын уджалысьяс, воласны кӧ «Югыд ваӧ».

Африкаса туристъяслы козин пыдди вичмисны Войвывса сувениръяс, тшӧтш и сюмӧдысь вӧчӧмторъяс да косьтӧм сус коль.