ЮГЫД ЛОЛӦН

Ветлысь-мунысьяслӧн 140 гӧгӧр котыр таво вӧлі «Югыд ва» национальнӧй паркын. Видзӧдлыны мичасьыс-мича вӧр-васӧ, шойччыштны, донъявны ассьыныс вынсӧ да сямсӧ гожӧм чӧжӧн волісны Перымысь, Челябинскысь, Екатеринбургысь, Киевысь, Харьковысь, Архангельскысь, Северодвинскысь туристъяс. Татысь позис аддзывны суйӧрсайса гӧсьтъясӧс — чехъясӧс, финнъясӧс, полякъясӧс, немечьясӧс, французъясӧс.

А тайӧ лунъясӧ «Югыд валӧн» уджӧн тӧдмасисны национальнӧй паркъясса директоръяслӧн став мирса Сӧветӧ пырысьяс, кодъяс локтісны... Танзанияысь.

Видзӧдлыны Европаса медся ыджыд да дзик ӧти татшӧм паркын эм мый. Сылӧн ыдждаыс 2 миллион гӧгӧр гектар. Джынйыс вӧр, мӧд джынйыс — гӧраяс, нюръяс, ю-ты-Европа да Азия ӧтлаасянінын паськӧдчӧм парк Печора-Ылыдзса заповедниккӧд ӧтув пырӧны ЮНЕСКО-лӧн став мирса вӧр-ва списокӧ «Комиын вӧрзьӧдлытӧм вӧръяс» пас улын. Татшӧм национальнӧй паркыс сэсся некӧн абу. Позьӧ помтӧг шензьыны татчӧс вӧр-ваыслӧн аслыспӧлӧслун да мичлун вылӧ. А мыйта озырлуныс му пытшкас! Тшугӧр, Косью, Ыджыд Сыня да мукӧд юын, гӧраясса тыясын кутшӧм сӧмын чери абу. Медся донаясыс — ком, кебӧс, пелядь, кумжа, чир, таймень. Сэсся и асьныс гӧраясыс чуймӧдӧны. На пӧвстын медджуджыдыс — Народа гӧра, сы бӧрын — Манарага, Карпинскӧй, Кӧлӧкӧльня, Неройка.

Паркыс дасысь муртса унджык во сайын котыртчис эз сӧмын туристлӧн нимкодясьӧм могысь. Медтӧдчанаыс видзны-дӧзьӧритны аслыспӧлӧс вӧр-васӧ да сэні олысьясӧс, тӧждысьны археологическӧй да геологическӧй памятникъяс вӧсна, велӧдны йӧзӧс, торйӧн нин томуловӧс пыдди пуктыны вӧр-ва видзан законъяс. Ӧд татшӧм озырлуннас, вӧрзьӧдлытӧм сӧстӧмлуннас вермас ошйысьны му шарвывса гежӧд пельӧс. Гӧгӧрвоана сьӧлӧм кылӧмыс туристъяслӧн, кодъяслы мойвиис аддзывлыны полярнӧй кытшбердса да Войвыв Уралса серпасъяс. Со тай гожӧмнас нин «Югыд ва» национальнӧй парклӧн Пӧдчеремса лесничествоӧ воліс республикаса челядьлӧн эколого-краеведческӧй экспедиция. Кулӧмдінын, Удораын, Койгортын, Луздорын, Айкатылаын да Сыктывкарын ӧні на казьтывлӧны 13 лун чӧж «Югыд ваӧд» югыд лолӧн ветлӧм-мунӧмсӧ, авъя вӧр-валӧн сывйын мойдын моз олӧмсӧ. Вунасны ӧмӧй сьӧлӧм вӧрзьӧдана аддзылӧмторъясыс, кодкӧ коляс-ӧ веськодьӧн «Югыд валӧн» югыд мичлун дорӧ?