МЕЖАДОРЫН

(Визин карулын)

Быдлаын ӧткодь.

Таво миян уна крестьяналӧн няньяс оз тырмы: зэра во вылӧ нӧшта шерӧн нянь жугалі. Оз кӧ отсӧг во, локтан тулысӧ уна йӧз пикӧ воасны.

Пӧжарнӧй делӧ.

Став вӧлӧсьтсӧ юкӧма нёль пельӧ (участок). Быд участокын эм пӧжарнӧй сарай, пӧжарнӧй машина, волисполкомын ещӧ эм ичӧтик машина. Лӧсьӧдӧма аскостса (добровольная) пӧжарнӧй дружина.

Комитет Взаимопомощи

воссис колян во нин. Сэні эм: 40 пуд нянь, 1 гӧр (косуля), кымынкӧ плуг, кӧйдыс весалан машина (сортировка) — «Триер». Ставсӧ тайӧ локтан тулысӧ сетасны крестьяналы. Ӧні мунӧ ас костын мыйсюрӧ чукӧртӧм Комитетлы отсӧг вылӧ.

Кооператив.

Миян кооператив уджалӧ слабиника. Ӧти-кӧ, бурджык уджалысьясыс абу; мӧд-кӧ, крестьяналӧн нинӧм абу сэтчӧ нуныыс — няньяс эз во, вӧралысь этша, кукань ку кындзи нинӧм абу.

Йӧзӧс югдӧдӧм

омӧля жӧ мунӧ. Абу йӧзыс тайӧ уджсӧ нуӧдныыс. Велӧдысьяс оз кыдзкӧ йӧз костас уджавны — дышӧдчӧны. Союз Молодёжи сӧмын мый вермӧ ноксьӧ том йӧз пӧвстын. ОБОНО-ысь корим машина ловъя картинаяс петкӧдлыны (киноаппарат «КОК»). Сетасны кӧ тайӧ «КОК»-сӧ, удж бурджыка кутас мунны.