КОМИ НЫВБАБА, КЫЛАН?

Коми нывбабаяс, вайӧ жӧ ми босьтчыламӧй йӧз моз овны! Дыр-ӧ гагъяс моз веглясям, кыскасям няйтын, пемыдінын? Олӧмыд воысь воӧ вежсьӧ, ӧтарӧ выльтор кыптӧ, выль ног овмӧсыд вежсьӧ. Ми деревняса нывбабаяс вермам олӧмсьыс дзикӧдз кольны. Олӧмыд кӧ ӧд миянӧс коляс, сэки вывті сьӧкыд лоӧ аслыным овны. Ёна нин ми сыысь колим! Колӧ миянлы вӧтчыны олӧм бӧрсяыс! Регыдджык олӧмсӧ вермам вӧтӧдны, ёнджыка кӧ кутам тӧдны мукӧд йӧзлысь бур олӧмсӧ, выльногса олӧмсӧ. Мӧда-мӧдлысь, мукӧд йӧзлысь олӧм-вылӧм, уджъяс гижӧны книгаӧ, календарӧ, газетӧ. Сідзкӧ, колӧ миянлы лыддьыны книгаяс, газетъяс. Сэтчӧ огӧ ёна манитчӧй. Грамотнӧйяс лыддьӧны, мукӧд кывзӧны. Майбыр, ӧні быд неграмотнӧй бабаыс ӧти кывтӧг гӧгӧрвоас, ставсӧ комиӧн гижӧма!

Коми аньяс, ӧні коми газетъястӧ, книгаястӧ дзик нин миян вӧсна лэдзӧны, миянӧс мортӧ пӧртӧм кузя. Ставсӧ сэтчӧ гижӧны крестьяна олӧм кыпӧдӧм, лӧсьӧдӧм, кокньӧдӧм йылысь. Оз ков велӧдчӧмысь яндысьны. Бур йӧз кувтӧдзныс пыр велӧдчӧны. Кымын уна мортыд тӧдӧ, велӧдӧ — сымын унджык ковзьӧ тӧдны-велӧдны.

Сійӧн ме со шуа — вайӧ жӧ ми ӧтвылысь газет пыр, книгаяс пыр мӧда-мӧдлысь, бур йӧзлысь велӧдчамӧй, бур овмӧс аслыным лӧсьӧдамӧй. Миянлы коми аньяслы унатор колӧ тӧдны, быдтор колӧ велӧдны. Челядьнымӧс огӧ кужӧй быдтыны, асьнымӧс огӧ кужӧй висьӧмысь, доймӧмысь, ӧбӧдитӧмысь видзны. Вывті пемыдӧсь, веритам нинӧм абуясӧ: шеваясӧ, вомидзьясӧ. Горт гӧгӧр, скӧт гӧгӧр, видз-му гӧгӧр огӧ кужӧ бура нуӧдны мукӧд йӧз моз. Колӧ кужысьяслысь велӧдчыны.

Ставсӧ та йылысь ӧні гижӧны комиӧн газетӧ, оз ков ӧти газет лыддьытӧг, кывзытӧг эновтны. Корӧ газетъяс женотделъясысь, школаясысь, исполкомысь, Союз молодёжысь. Тшӧктӧй челядьнытӧ лыддьыны. Чукӧртчӧй ӧтилаӧ да кывзӧй лыддьӧмсӧ унаӧн. Велӧдысьяс нимкодьпырысь лыддясны быдӧнлы, сӧмын кывзӧй!

Коми ань.