КЫДЗИ ПАСЬКӦДНЫ СИКТЪЯСӦ ГАЗЕТ

Кутшӧм ыджыд бур вайӧ крестьяналы газет — колӧ нин быдӧнлы тӧдны. Сӧмын зэв на этша газет пырӧ коми крестьяна костӧ. Ӧні миян газет «Югыд туй» петӧ комиӧн, гӧгӧрвоана кывйӧн. Сиктъяссянь локтӧны миянлы юӧръяс: ставныслы пӧ нимкодь, кор аддзӧны коми газет, ставныс пӧ зэв зіля кывзӧны коми кывйӧн гижӧм. Унаӧн эськӧ судзӧдны кӧсйӧны газетсӧ, да нинӧм вылӧ пӧ — сьӧмныс абу. Гашкӧ, ӧткӧн-ӧткӧн збыль сьӧкыд газеттӧ судзӧдны, кӧть доныс эськӧ абу зэв ыджыд (пӧлтинник тӧлысь). Позьӧ газет крестьяна костӧ уна ногӧн паськӧдны. Сы йылысь ме неуна тані гижышта.

Ӧти-кӧ: газет позьӧ судзӧдны быдӧнлы аслыс (ӧтилы). Чукӧртчыны морт даслы кымын, вӧчны список, индыны адресъяс, сьӧм сетны пошта вылӧ ӧтилаын (донтӧмджык лоӧ сьӧмсӧ мӧдӧдны). Редакция сэсся список сертиыс кутас ыстыны газетъяс быдӧнлы ас ним вылас.

Мӧд-кӧ: позьӧ газет судзӧдны складчинаӧн (рочӧн кӧ — коллективно). Морт кызь кымын ӧтлаасясны да тэчсясны, шуам кӧть, вит газет вылӧ. Кодкӧ ним вылӧ индасны адрес. Сэки витнан газетыс кутас ӧтпырйӧ воны ӧти вылӧ, сійӧ разӧдас аслас суседъяслы. Позьӧ тадзи тэчсьыны дзонь сиктъясӧн. Татшӧм ногӧн медбур, ме чайта, лоӧ.

Сэсся ӧні уна вӧлӧсьтӧ ыстӧны газетъяс налӧн шефъясыс (карса коммунистъяс да служащӧйяс отсалӧны культура кыпӧдны деревняясын).

Но тайӧ на этша. Оз на быд пельӧсӧ во миян газетным, оз на быд коми морт кыв газет гижӧдсӧ. Ӧні воӧ ӧти газетыс миян кыксё морт вылӧ. Колӧ ёна на содтыны, мед эськӧ ӧти газетыс воис кӧть ветымын морт вылӧ.

Содтыны позьӧ. Быд вӧлӧсьтын эм потребительскӧй лавка (ЕПО). Сійӧ могӧ тшӧтш пырӧ йӧзӧс югдӧдӧм — культура кыпӧдӧм. Оз эськӧ рӧзӧритчы кооперативыд, аслас сьӧм вылӧ кӧ (прибыль вылас) судзӧдны кутас быд грездӧ кык-куим газетӧн. Шуам кӧть: Нёбдінын 6 сикт (Оноп, Ӧника, Трӧшсикт, Яксикт, Паркерӧс, Тимасикт; вичко дор ог лыддьы — сэні газетыд эм). Тайӧ квайт сиктас кӧ судзӧдны 20 газет, ставнас сувтас 1 червонеч тӧлысь. Ыджыд-ӧ нӧ сійӧ деньга?

Абу дивӧ кооперативъяслы збыльысь нин босьтчыны деревняяс югдӧдны. Пемыд крестьяна кӧ асьныс оз гӧгӧрвоны либӧ гӧльлуныс найӧс кутӧ — колӧ налы отсыштны петны югыд туй вылас.