ОТУВСА ВӦЛӦСЬТЫН

Омӧля уджалӧмла пикӧ воӧмаӧсь.

Ме неважӧн ветлі Отйӧ (Емдін карувса вӧлӧсьт). Зэв на омӧля олӧны сэні йӧзыс! Омӧльджыка на весиг первой воясӧ дорысь революция бӧрын. Сэки гӧль йӧзлы сетӧны вӧлі «норма»: сю, пызь, карасин, табак, истӧг, ситеч, унатор. Ӧні нинӧм вылӧ сійӧ ньӧбныс налы. Нажӧтка некутшӧм абу; оз вӧравны, оз сортовка лэдзны, дзик некытысь деньга босьтны. Кӧзяйствоысь немтор оз лишав вузавны: омӧля уджалӧны муяснысӧ, турун оз кӧдзны, скӧт этша видзӧны, сійӧн налӧн нинӧм и абу: вый ни, кукань ку ни, яй ни, немтор.

Асьныс шуӧны: колӧ пӧ ӧтувтчыны.

Ме сёрнитыштлі крестьянакӧд; асьныс шуӧны: ми пӧ кутам сэсся тшыгла кувны. Некыдз пӧ огӧ вермӧй кыпӧдны ассьыным овмӧс. Ме налы висьталі, колӧ мися, тіянлы бурджыка уджавны кутчысьны, мед унджык эмбур кутас воны, содны. Сэки сэсся асьныд, мися, гӧгӧрвоанныд, да водзӧ кутанныд овмӧс кыпӧдны. Асьныс сэтчӧ шуӧны: ми пӧ гӧгӧрвоам эськӧ ас омӧль олӧм йылысь — да сӧмын пӧ ӧткӧн-ӧткӧннад немтор он вермы вӧчны. Асьныс гӧгӧрвоӧны, да оз вӧчны! Миян пӧ эз на вӧв весиг юклысьӧмыс революция бӧрын, сэсся пӧ миянӧс асланым гӧльлуныс ёна сёйӧ, нинӧм вылӧ пӧ весиг плугтӧ босьтны ни, турун кӧйдыстӧ ни.

Шыбитӧй лёкногса олӧм!

Гӧль олӧм кузяыс и йӧзыс омӧль лоины: самӧкур ёна пуӧны, гусясьӧны. Кӧджмудорын куим крестьянинлысь гидсьыс нуӧмаӧсь ыжъяссӧ, Эжвадорысь кӧвтымъяс, ботанъяс витӧс кымын гусялӧма, жытникъяссьыс весиг няньсӧ новлӧны.

Мӧйму вӧлӧм кӧсйӧны лӧсьӧдны машинаӧн уджалан тӧварищество (артель), уставыс и быдтор нин вӧлӧма, колӧма сӧмын нулыны Емдінӧ — земотделын пасйыны. Сэсся собранньӧ вылас кодсюрӧ кутӧмаӧсь шуавны: власьтыс пӧ тайӧ вежсяс, да машинаясыс миян вошасны — сэсся нинӧм абу артмӧма. Со на кутшӧм налӧн сямныс!

Лыддьӧй газет!

Татшӧм лёк олӧмыс со мыйла мунӧ: От вӧлӧсьтын сизим сюрс (7000) морт, вӧлӧма сӧмын куим школа. Школа пыдди видзӧны куим попӧс. Дерт сэсся, вывті ен дор олігад эз вермывны югдӧдчыныд! Газет оз судзӧдны, нигаяс оз лыддьыны. «Югыд туй»-тӧ куимӧн сӧмын судзӧдӧны: Кӧджмудорӧ кыкӧс, Отйӧ ӧтикӧс. Мужикъяс шуӧны: зэв пӧ эськӧ окота газеттӧ лыддьыны, да немтор вылӧ пӧ судзӧдныс, кӧпейка пӧ деньга абу, сійӧн пӧ немтор огӧй тӧдӧ.

Норасьӧны сӧветскӧй служакъяс вылӧ, кыткӧ кӧ аддзасны ичӧтик ӧшыбка налысь.

Водзӧ вылӧ эськӧ колӧ, коді газетсӧ судзӧдӧ деревняясын, мед сійӧ гижас сэтшӧмторъяссӧ, найӧ унатор тӧдӧны — бурсӧ и лёксӧ.

Левко пи.