ТУЙДӦМ КОМИӦН ЛЫДДЬЫНЫ, ГИЖНЫ

Газет «Югыд туй» ӧні петӧ коми кывйӧн. Сиктса олысьяслы зэв сьӧлӧм вылас воӧ коми кывнад гижӧмыд, шуӧны: ӧні пӧ ставсӧ гӧгӧрвоам. Кывзынытӧ кывзӧны, лыддьынытӧ сьӧкыд, абу на велалӧмаӧсь. Эмӧсь пӧ, шуӧны, тӧдтӧм шыпасъяс (букваяс), огӧй пӧ кужӧй, кыдз колӧ шуныыс, сэтшӧм букваясыс пӧ важ азбуки вылын абу.

Кымынкӧ коми букваяс збыль абу роч азбукиын. Выльысь лӧсьӧдӧм коми букваяссӧ деревняад пӧшти на некод оз тӧд, школаын велӧдчысьяс кындзи. Коми азбукияс эз на вермыны паськавны быдлаын, велӧдчыны гырысь йӧзлы некысь.

Сы понда ме кӧсъя неуна туйдавны деревняса йӧзлы, кыдзи колӧ лыддьыны, гижны комиӧн.

Став коми букваыс гижсьӧ роч букваӧн жӧ, сӧмын роч азбукиысь шыбитӧма: ю, я, э, и, ц, ф, х, ь, й, д, сы пыдди лӧсьӧдӧма выль букваяс: ԁ, ԃ, җ, ԅ, ԇ, і, ј, ԉ, ԋ, ԍ, ԏ, ӧ — дас кык буква.

Ԁ — колӧ шуавны, кыдзи шуавсьӧ роч буква Д (ԁозмук — посуда, ԁас — десять);

Ԃ — кыдзи шуавсьӧ — дь — (ԃаԃ — дядя, ԁаԃ — санки);

Җ — кыдзи шуавсьӧ — дж — (җын — половина, җоҗ — пол);

Ԅ — кыдзи шуавсьӧ — зь — (кыԅ — двадцать, пыԅ — мука);

Ԇ — кыдзи шуавсьӧ — дзь — (ԇоԇӧг — гусь, кыԇ — берёза);

Ј — кыдзи шуавсьӧ — й — (јај — мясо, јі — лёд);

Ԉ — кыдзи шуавсьӧ — ль — (ԉок — плохой, коԉ — шишка);

Ԋ — кыдзи шуавсьӧ — нь — (ԋаԋ — хлеб, піԋ — зуб);

Ԍ — кыдзи шуавсьӧ — сь — (ԍір — смола, ԍурс — тысяча);

Ԏ — кыдзи шуавсьӧ — ть — (ԏуԋі — катанки, Каԏа — Катя);

Е — кыдзи шуавсьӧ — э — (Ежва — Вычегда, еԋка — свекровь);

Ӧ — дзик коми буква — (кӧк — кукушка, ӧԏік — один).

Сэсся пондамӧй ичӧтика лыддьыны, гижны.

Код кадӧ мӧдан .... Коԁ каԁӧ мӧԁан.

Дадь пыдди додь .... Ԁаԃ пыԃԃі ԁоԃ.

Ыджыд удж уджавны .... Ыҗыԁ уҗ уҗавны.

Визя азям киссьӧма .... Віԅа аԅам кіԍԍӧма.

Дзоньвидза морт .... Ԇоԋвіԇа морт.

Льӧм ляз .... Ԉӧм ԉаз.

Бур ань Малань .... Бураԋ Малаԋ.

Вася мыськасьӧ-идрасьӧ .... Ваԍа мыԍкаԍӧ-іԁраԍӧ.

Кутю тявзӧ Терень вылӧ .... Куԏу ԏавзӧ Ԏереԋ вылӧ.

Вай — вај, ю — ју, ёна — јона, сёй — ԍој, эй — еј, яй — јај, Яков — Јаков, туй — туј.

Ме чайта, тайӧ туйдӧм серти коми йӧзлы зэв нин позяс велӧдчыны гижны, лыддьыны комиӧн.

Колӧ коминад лыддьысьлывны унджыкысь, оз ков дӧзмыны, дышӧдчыны, сэки регыдджыка велалан.

Комиӧн лыддьыны велӧдчан нига эм Сандрӧ Васьӧлӧн гижлӧм, вузавсьӧ лавкаясын, школаясын, клубъясын, доныс абу ыджыд, позьӧ быдӧнлы ньӧбны.

Велалан кӧ коминад лыддьыны, сэк зэв лоас телепит лыддьысьны. Нигаясад, газетъясад быдсяматорсӧ гижӧны: кӧні мый вӧчсьӧ, кӧні кыдзи олӧны, кӧні мый бур, омӧль, кыдзи колӧ бурджыка, лӧсьыдджыка овны, бурджык олӧм лӧсьӧдны, асьтӧ кокньӧдны сьӧкыд уджъясысь. Ас чужан кывйыд медбур, медгӧгӧрвоана мукӧд дорысь. Воас кад — Коми Обласьтыд зэв ёна паськалас, воссясны пабрикаяс, заводъяс, кӧрт туйяс, сэки олысь лоӧ зэв уна, пондасны быдӧн велӧдчыны коми кыв вылӧ.

Н. Чеусов.